Kush është Shaban Muja, personi që mori para për ta vrarë Rugovën? Ja çfarë kishte thënë
Njëri prej personave kyç të Lëvizjes Popullore të Kosovës (LPK), Shaban Muja, ish i burgosur politik në Kosovë, është përmendur nga Milaim Zeka, si person i cili mori ofertë nga Bujar Bukoshi për ta vrarë presidentin Ibrahim Rugova.
Shaban Muja është njëri nga personat që kishte qenë prezent në takimin që u zhvillua në Oslo, ndërmjet Ahmet Krasniqit, Xhavit Halitit dhe të tjerëve.
Shaban Muja është vëllai i ish deputetit të Kuvendit të Kosovës, Shaip Muja.
Lidhur me deklaratën e Milaim Zekës, ka folur vet Shaban Muja.
Ish-aktivisti i ilegales, Muja deklaroi se nuk i janë ofruar para për këtë punë, por i është thënë që nëse dëshirojnë para për luftë, duhet likuiduar “Zabuni” e “Belba” – (“Belba” sipas Zekës ishte nofka e Fehmi Aganit ndërsa “Zabuni” ka qenë Ibrahim Rugova).
“Unë i qëndroj mbrapa çdo deklarate që kam thënë, secilës, më kanë thënë që nëse doni para për luftë, kryne qata”, ka deklaruar Shaban Muja.
E lidhur me ofertat për vrasjen e Rugovës, Muja edhe më herët në një intervistë për emisionin “Pa Rrotlla” të Milaim Zekës, e kishte përmendur se për t’iu dhënë para për luftë, duhet të likuidohet Ibrahim Rugova dhe Fehmi Agani.
(Kosova Sot Online)