Haradinaj-Merkelit: Kosova është gati

  • 20 gusht 2019 - 09:19
Haradinaj-Merkelit: Kosova është gati

Kryeministri në dorëheqje, Ramush Haradinaj përmes Twitterit ka përgëzuar Kancelaren Angela Merkel për rikonfirmimin e mbështetjes për Ballanin Perëndimor për integrim në Bashkimin Evropian.

Haradinaj ka postuar një fotografi me Kancelaren Merkel gjatë një takimi që ka pasur me të në Berlin.

Haradinaj ka shkruar se Bashkimi Evropian do të jetë më i fortë me gjashtë shtetet e Ballkanit Perëndimor.

“E përshëndes qëndrimin e kancelares Merkel për konfirmimin e përkrahjes së perspektivës së Ballkanit Perëndimor për zgjerimin e BE-së sot nga qyteti hungarez i Sopron-it. Bashkimi Evropian do të jetë më i fuqishëm dhe me më shumë mirëqenie me afrimin e gjashtë vendeve të Ballkanit Perëndimor drejt BE-së. Kosova është gati”, ka shkruar në Twitter Haradinaj.

Kancelarja gjermane Angela Merkel ka thënë se Evropa do të jetë e bashkuar vetëm kur të gjitha shtetet e Ballkanit Perëndimor të bëhen anëtare të Bashkimit Evropian.

Evropa do të jetë e bashkuar vetëm kur të gjitha shtetet e Ballkanit Perëndimor të bëhen anëtare të Bashkimit Evropian, ka porositur kancelarja gjermane Angela Merkel.

Ajo i bëri këto deklarata në Hungari në shënimin e 30 vjetorit të ashtuquajturit “Piknik panevropian”.

Merkel ka thënë se Evropa nuk do të jetë e bashkuar derisa komplet Ballkani Perëndimor të jetë pjesë e Bashkimit Evropian.

“Nëse analizoni gjërat gjeografikisht e po ashtu shikoni edhe hartën, do të shihni se Evropa do të jetë e bashkuar vetëm me shtetet e Ballkanit Perëndimor”, deklaroi Merkel para gazetarëve.

Deklaratat nga Merkel paraqesin një tjetër pasqyrë të qëndrimit të Berlinit për zgjerimin e Bashkimit Evropian, që është ide e pambështetur nga disa prej shteteve të tjera anëtare të BE-së.

(Kosova Sot Online)