Në Peru zbulohet murali i vjetër 3800 vjet
Arkeologët në Peru e kanë zbuluar një mural që besohet se është rreth 3800 vjet i vjetër. Murali u gjet brenda një ndërtese për ceremoni publike në veri të kryeqytetit peruan, Lima.
Në muralin e ndërlikuar janë të paraqitura disa figura që përfaqësojnë shtresa të ndryshme të njerëzve.
Ruth Shady Solis, drejtoreshë e Zonës Arkeologjike të Caral-it, beson se ky mural paraqet pasurimin e tokës me ujë përmes të reshurave.
Ajo tha se në civilizimin andian, bretkosat e simbolizonin ujin dhe se fytyra e paraqitur në pjesën e poshtme përfaqëson njerëzit duke pritur për rënien e shiut dhe vazhdimin e jetës.
Në një pamje tjetër shihen katër koka të njerëzve me gjarpërinj që i kanë rrethuar ato.
Hulumtuesit thanë se këto skulptura mund të jenë bërë në një periudhë të vështirë, kur njerëzit janë përballur me mungesë ushqimesh.
Kërkimet e arkeologëve për gjësende të lashta në këtë pjesë kishin filluar në vitin 2007. Ekspertët besojnë se në këtë zonë ka jetuar një komunitet i lashtë që është marrë me bujqësi dhe peshkim, shkruan “BBC”.
(Kosova Sot Online)