Anëtari i Kryesisë së LDK’së: Koha e duhur për ndryshime

  • 24 gusht 2019 - 17:46
Anëtari i Kryesisë së LDK’së: Koha e duhur për ndryshime

Anëtari i Kryesisë së LDK’së, Valon Murtezaj thotë se Kosovës tashmë i duhet një lidership i fuqishëm qeverisës për të ecur drejt të ardhmes në mënyrë të sigurt.

Në një shkrim në profilin e tij zyrtar, Murtezaj thotë se është koha e duhur për të bërë ndryshime.

Ai thotë se LDK’ja duhet ë ofrojë një alternativë qeverisëse e cila do ta trasonte rrugën e Kosovës drejt zhvillimit për tri dekadat e ardhshme.

Në këtë shkrim ai përmend luftën kundër korrupsionit, përmirësimin e politikës së jashtme dhe përmirësimin e jetës së qytetarëve të Kosovës.

Shkrimi i plotë:

 Kosovës, sot, i duhet lidership qeverisës në mënyrë që t’i sigurohet rrugë e sigurtë.

Lidership që i prin ecjes së përshpejtuar të Kosovës, në zhvillimin e saj të brendshëm si shtet, dhe në proceset e integrimit evropian.

Kosovës i duhet një vizion i fuqishëm i bazuar në vlera të demokracive evropiane perëndimore dhe të Shteteve të Bashkuara.

Lidhja Demokratike e Kosovës duhet të ofrojë dhe do të ofrojë një vizion që është përmbledhje projektesh qeverisëse integrative në rrugën zhvillimore që e pret Kosovën në tri dekadat e ardhshme.

Synimi kryesor është për të vendosur në kahjen e duhur punën trasuese për çfarë besohet të jetë dimensioni i ri sfidues zhvillimor për të ardhmen strategjike të Kosoves në tridhjetë vitet e ardhshme.

Koha është e duhur për ndryshim.

Në politikat e brendshme, lufta kundër korrupsionit, sundimi i ligjit, dhe transformimi në të gjitha dimensionet qeverisëse duhet të jenë qëllime primare në dhjetë vitet e ardhshme.

Në politikën e jashtme të Kosovës, mbetet gjetja e rrugëve më efektive në mënyrë që Kosova të këtë pozicion më të mirë në sistemin e marrëdhënieve ndërkombëtare. Kjo kërkon përfaqësim adekuat, mendje dhe sjellje evropiane, dhe lidership të kohës.

Koha po e kërkon që qytetarit të Kosovës t’i ofrohet emocion pozitiv dhe motivim optimist për të ardhmen, duke i ofruar jetë më të mirë.

Në afat-gjatë përqëndrimi duhet të jetë afirmimi dhe jetësimi i këtij vizioni strategjik.

Si një anëtar i kryesisë së Lidhjes Demokratike të Kosovës do të jap gjithë kontributin konstruktiv, me gjithë përkushtimin pozitiv, në arritjen e këtij vizioni.

(Kosova Sot Online)