Ambasadori rus në Beograd u rri hazër deklaratave të amerikanëve për Kosovën, i reagon senatorit Johnson

Para pak ditësh në Prishtinë e Beograd kanë qëndruar dy senatorët amerikan, Ron Johnson dhe Chris Murhphy, të cilët kanë dhënë mesazhet e tyre për finalen e dialogut në mes të Kosovës dhe Serbisë.

Murphy në fjalën e tij kishte paralajmëruar se për të arritur deri tek finalja do të duhet të bëhen zgjidhje të vështira, duke bërë thirrje që dy palët të bëjnë sakrificë.

E për një finale e cila s’do të mund t’iu pëlqejë as Kosovës e as Serbisë, në një intervistë për Zërin e Amerikës, ka folur sot edhe senatori Ron Johnson.

Ai ka thënë që në mes të dy shteteve mund të arrihet një marrëveshje e cila s’do të jetë e mirë për asnjërën palë.

“Kjo është e domosdoshme për të bindur popullin e Kosovës dhe të Serbisë, sepse ajo mund të jetë një marrëveshje të cilën ata mund të mos e pëlqejnë, pikërisht si Marrëveshja e Prespës. Qytetarët e Greqisë dhe asaj që sot është Maqedonia e Veriut nuk ishin të kënaqur me të. U desh guxim politik për ta arritur atë marrëveshje. Besoj se të dyja këto vende, pas jo shumë muajsh do ta kujtojnë këtë dhe do të thonë: përse e bëmë aq të madhe? Pse u grindëm aq shumë?”, ka deklaruar Johnson për Zërin e Amerikës.

Ndërkohë ndaj këtyre deklarimeve të senatorit Johnson ka reaguar menjëherë ambasadori i Rusisë në Beograd, Alexander Bocan-Harchenko, duke thënë se ‘ka kaluar koha kur amerikanët i kanë treguar dikujt se çfarë është e mirë dhe çfarë është e keqe”.

“Është befasuese që ende ka njerëz, madje edhe prej atyre me ndikim, si senatori amerikan, Ron Johnson, të cilët e dijnë shumë më mirë se si jetojnë kombe të tëra. Koha kur ata u kanë shpjeguar popujve se çfarë ishte e mirë për ta, çfarë ishte e keqe e çfarë e papranueshme, ka kaluar shumë kohë më parë”, ka shkruar në reagimin e tij në twitter Bocan-Harchenko.

(Kosova Sot Online)