Detaje nga arrestimi i gjyqtarit Sali Berisha në Pejë

  • 20 shtator 2019 - 11:24
Detaje nga arrestimi i gjyqtarit Sali Berisha në Pejë

Policia e Kosovës ka dhënë detaje rreth arrestimit të mbrëmshëm të gjyqtarit në Gjykatën Themelore të Pejës, Sali Berisha.

Drejtoria për Hetimin e Krimeve Ekonomike dhe Korrupsionit, gjegjësisht Njësiti Rajonal për Hetimin e Krimeve Ekonomike dhe Korrupsionit në Prishtinë, ka pranuar informacione nga viktima, që ka pasqyruar abuzimin e funksioneve gjyqësore, veprime që diskreditojnë pozitën dhe figurën e gjyqtarit si dhe imazhin e sistemit gjyqësor.

Berisha dyshohet që ka kërkuar një shumë prej 4 mijë eurove, në mënyrë të drejtpërdrejt, në mënyrë që të mos veprojë në pajtim me detyrën e tij zyrtare në cilësinë e gjyqtarit.

Gjatë operacionit policor i dyshuari ka pranuar shumë prej 2 mijë eurove, për të përmbyllur ofertën e precizuar në proces për të finalizuar shumën prej 6 mijë eurove. Pas arrestimit të dyshuarit, në prezencën e avokatit mbrojtës në zyret e e NJRHKEK-së Pejë , i janë gjetur 2 mijë euro.

Me aprovim të prokurorit është kontrolluar banesa e të dyshuarit ku janë gjetur dhe janë sekuestruar edhe një armë zjarri, një karrikatorë dhe dhjetë fishekë, 10 mijë euro, shkresa, aktgjykime dhe procesverbale.

I dyshuari, me urdhër të prokurorit,  është dërguar në mbajtje për 48 orëve.

Kjo është komunikata e plotë e Policisë lidhur me rastin:

Drejtoria për Hetimin e Krimeve Ekonomike dhe Korrupsionit, gjegjësisht Njësiti Rajonal për Hetimin e Krimeve Ekonomike dhe Korrupsionit në Prishtinë, ka pranuar informacione nga viktima, që ka pasqyruar abuzimin e funksioneve gjyqësore, veprime që diskreditojnë pozitën dhe figurën e gjyqtarit si dhe imazhin e sistemit gjyqësor.

Gjatë procesit të hetimit preliminar janë ndërmarrë masat adekuate për të identifikuar formën e aplikuar më parë të korrupsionit nga i inkriminuari. Në koordinim me Prokurorinë Speciale janë aplikuar praktikat e njohura nga Kodi i Procedurës Penale, duke u mbështetur fuqishëm në një hetim profesional të bazuar në dëshmi.

Gjatë aplikimit të masave hetimore kemi siguruar dyshimin e bazuar se i inkriminuari ka kërkuar realizimin e ofertës, në atë mënyrë që i njëjti kërkon/pranon përfitimin material, (kohë më parë dyshohet se janë dorëzuar nga viktima dhe janë pranuar nga i dyshuari i lartshënuar katër mijë (4.000.00) euro), në mënyrë të drejtpërdrejtë, në mënyrë që mos të veprojë në pajtim me detyrën e tij zyrtare, në cilësinë e gjyqtarit.

Gjatë operacionit policor, të zhvilluar me datën 19 shtator 2019, i inkriminuari ka kërkuar/pranuar shumën prej dymijë (2.000.00) eurove, për të përmbyllur ofertën e precizuar në proces për të finalizuar shumën prej gjashtëmijë (6.000.00) eurove, në lidhje me lëndën/çështjen penale të përmbyllur me aktgjykim kohë më parë. Pas arrestimit i dyshuari është kontrolluar në prezencën e avokatit mbrojtës, në zyrën e NJRHKEK-së Pejë, me ç’rast i janë gjetur në xhep paratë dymijë (2.000.00) euro, të cilat janë përdorur për aplikimin e masës së fshehtë ‘simulim i veprës së korrupsionit’.

Me aprovim verbal të prokurorit, është kontrolluar banesa e të dyshuarit, ku janë gjetur dhe janë sekuestruar:

· një armë zjarri, tipi Zaza-min, kalibër: 8mm

· një karikator dhe dhjetë (10) fishekë të kalibrit 8mm

· dhjetëmijë euro (10.000.00) euro

· shkresa, aktgjykime dhe proces verbale gjyqësore

Me urdhër të prokurorit special, i dyshuari është ndaluar në qendër të mbajtjes për 48 orë.

(Kosova Sot Online)