PDK kërkon rinumërim, pretendon se një numër votash iu kanë shkuar subjekteve tjera

  • 08 October 2019 - 10:58
PDK kërkon rinumërim, pretendon se një numër votash iu kanë shkuar subjekteve tjera

Partia Demokratike e Kosovës, dje pas dite ka dorëzuar një ankesë në PZAP, për arsye se pretendon që kanë ndodhur disa parregullsi gjatë numërimit të votave, shkruan media.

Lajmin për media e ka konfirmuar Mul Desku kryesues i Panelit Zgjedhor për ankesa dhe parashtresa (PZAP).

Sipas tij në PZAP, dje pasdite PDK ka dorëzuar një ankesë me anë të së cilës po pretendon se kanë ndodhur disa parregullsi gjatë numërimit të votave, por nuk ka dhënë ndonjë detaj se çfarë ka kërkuar saktësisht PDK’ja përmes asaj ankese.

“Jemi në dijeni se dje ka ardhur një ankesë nga ky subjekt politik. Deri më tash kaq mund të them, nuk kemi asnjë informacion rreth pretendimeve të ankesës së kësaj partie”, ka thënë Desku për media.

Sipas tij tashmë PZAP është duke u marrë me ankesën e PDK-së, megjithatë Desku thotë se nuk mund të konfirmojnë asgjë nëse qëndron diçka prapa pretendimeve të PDK’së për parregullsi.

“Deri atëherë nuk mund të konfirmojmë se qëndron diçka prapa pretendimeve” ka thënë Desku.

Ndërkohë Betim Gjoshi përfaqësues i PDK’së në KQZ, në një prononcim për media ka konfirmuar se kanë kërkuar rinumërim, pasi pretendojnë që rreth 1000 vota të PDK’së janë bartë tek partitë tjera, si pasojë e një defekti në forumlarët e KQZ’së.

“Realisht nuk  jemi anku për shkak të parregullsive. Por KQZ rezultatin e formularëve e ka shtypur në 24 rubrika e kanë qenë 25 parti. Ka disa raste që votat tona janë bartë tek subjektet e tjera dhe kemi kërkuar rinumërim që votat me u kthy në vend të vetin, asgjë tjetër. Na kemi kërkua që me u rinumërua që me na u kthy rezultati.”, ka thënë Betim Gjoshi për media.

Gjoshi pretendon që rreth 1000 vota të PDK’së kanë shkuar tek subjketet tjera.

Ndërkohë në KQZ tashmë procesi i numërimit të votave po shkon drejt fundit kur kanë mbetur pa u numëruar edhe më pask se 2 përqind të votave. LVV ka dalë e para, LDK’ja e dyta ndërkohë PDK’ja e Kadri Veselit e treta. Veseli në një konferencë për media në orët e vona të 6 tetorit e ka pranuar humbjen dhe ka thënë se partia e tij do të shkojë në opozitë.

(Kosova Sot Online)