Në mes të arës i ekzekutuar me kallashnikov, askush nuk pa asgjë. Misteri i vrasjes së babait të dy fëmijëve...

Shkoi për të marrë gështenja, gjendet i vrarë nga të afërmit. Lazer Arraj, 55 vjeç, është gjetur i ekzekutuar me dy plumba kallashnikovi në mes të një are. Babai i dy fëmijëve jeton prej disa vitesh në qytetin e Shkodrës, por këtë fillim jave kishte shkuar në fshatin e tij të lindjes. Ngjarja ka ndodhur në fshatin Palaj të Malësisë së Dukagjinit, ku Arraj kishte shkuar për të mbledhur gështenja.

Ende mbeten mister rrethanat dhe motivet e kësaj vrasjeje, ndërkohë që Policia e Shkodrës po punon për zbardhjen dhe identifikimin e autorit. Gjithçka ka ndodhur pasi babai i dy djemve po bëhej gati për t’u kthyer në Shkodër.

“Me datë 21.10.2019, rreth orës 12:00, në fshatin Shosh, Shkodër, dyshohet se është vrarë me armë zjarri shtetasi L.A. 55 vjeç, banues në fshatin Palaj, Shosh, Shkodër. Shërbimet e Policisë dhe grupi hetimor kanë shkuar në vendngjarje dhe po punohet për sqarimin e rrethanave të ngjarjes, identifikimin e kapjen e autorit”, bëhet e ditur zyrtarisht nga Policia lidhur me ngjarjen.

Trupi i 55-vjeçarit u gjet nga të afërmit e tij i shtrirë në tokë, ndërsa kanë deklaruar në Polici se nuk kanë dëgjuar të shtëna apo të kenë parë ndonjë person, me të cilin është konfliktuar viktima. Trupi i Arrajt u dërgua në morgun e Spitalit Rajonal të Shkodrës. Nga ekspertiza mjeko-ligjore ka rezultuar se është qëlluar dy herë në trup. Arma e krimit rezulton se ka qenë një kallashnikov. 

Pak orë pas ngjarjes së rëndë, forca të shumta të Policisë mbërritën në vendin e ngjarjes. Ato kanë kryer krehje të zonës dhe kontroll të çdo automjeti, që ka kaluar në atë zonë malore. Gjithashtu është bërë shoqërimi i disa personave që mund të kenë dijeni mbi atë që ka ndodhur, por deri tani nuk është arritur në ndonjë përfundim.

Sipas hetuesve, dy pistat kryesore të hetimeve mbeten ajo e ndonjë konflikti të çastit me ndonjë prej banorëve të zonës, që mund të ketë çuar në vrasjen e 55-vjeçarit dhe ajo e ndonjë gjakmarrjeje të vjetër të familjes së Lazër Arrajt, por kjo mbetet për t’u verifikuar pas marrjes në pyetje të dy djemve dhe familjarëve të viktimës.

(Kosova Sot Online)