Rreth 400 mijë britanikë e nënshkruajnë peticionin për referendum të ri

Për pesë ditë, më shumë se 380 mijë persona në Britani të Madhe e kanë nënshkruar peticionin me të cilin kërkohet mbajtja e referendumit të dytë për Brexit-in.

Letra e hapur, e organizuar nga grupi “Vota e Popullit” dhe gazeta “The Independent”, bën thirrje që zyrtarët në Britani dhe në Bashkimin Evropian t’i mundësojnë popullit britanik që të votojë për miratimin apo kundërshtimin e planit të kryeministrit Johnson për Brexit-in.

Qindra mijëra nënshkrime janë shtuar në listën e emrave që e përkrahin këtë peticion që nga dita kur rreth një milion njerëz marshuan para kuvendit britanik të shtunën e kaluar për të kërkuar referendum të ri.

Në këtë peticion thuhet: “Ne nuk duam që njerëzit e pushtetshëm ta shtyjnë popullin drejt një Brexit-i që do ta dëmtojë ekonominë në Mbretërinë e Bashkuar dhe Bashkimin Evropian, që do ta rrezikojë procesin e paqes në Irlandën Veriore dhe që do të sjellë vite të tjera me paqartësi dhe kaos”.

“Na lejoni të vendosim nëse duam të vazhdojmë me këtë proces. Na lejoni të vendosim përmes votës së popullit”, thuhet më tej në këtë letër.

Ndryshe, gazeta “The Independent” është bërë pjesë e kësaj fushate nga viti 2018 dhe deri më tash e ka siguruar përkrahjen e 1.3 milion njerëzve, shkruan “Independent”.

(Kosova Sot Online)