Kryemadhi: Lotët e nënave atje janë mallkim për Edi Ramën
Dhimbja dhe lotët e nënave dhe fëmijëve që mbetën pa shtëpi do të bëhen shumë shpejt, mallkimi dhe ndëshkimi mbi Edi Ramën dhe bandën e tij të pushtetit!
Kështu shkruan kryetarja e LSI-së Monika Kryemadhi në lidhje me përplasjet e forta të kësaj të marte në zonën e Astirit midis banorëve protestues dhe forcave të policisë.
Në një reagim mbi situatën e krijuar sot me ardhjen e IKMT-së për prishjen e 33 objekteve në zonë, Kryemadhi thekson se ajo çka ngjau sot është një dhunë shtetërore e ushtruar në tejkalim të plotë të kompetencave dhe ligjit ndaj banorëve të Unazës së Re. Kryemadhi shprehet se u jep fjalën banorëve të Astirit se kur opozita të vijë në pushtet, të gjithë ata do të dëmshpërblehen për banesat që po tenton t’ja prishë qeveria.
REAGIMI I KRYETARES SË LSI:
“Dhuna shtetërore e ushtruar sot në mëngjes me të gjithë barbarinë antinjerëzore e në tejkalim të plotë të kompetencave të ligjit ndaj banorëve të Unazës së Re, është dëshmia e radhës së pushtetit të Edi Ramës në ortakëri me krimin dhe korrupsionin, është prova e qartë se makineria qeverisëse është vënë në shërbim të klaneve kriminale, për interes të të cilave nuk kursen as dhunën ndaj qytetarëve, ndaj grave e fëmijëve të pa mbrojtur, ndaj të moshuarve dhe gjithë të tjerëve pa dallim.
Është gjithashtu edhe treguesi më i qartë se e gjithë retorika e tij për “Drejtësinë e Re” është një mashtrim, pasi drejtësia atij i duhet për të mbrojtur krimet dhe korrupsionin, ndërsa për qytetarët e pa mbrojtur dhe në nevojë ka zgjedhur dhunën dhe paligjshmërinë.
Po ndërkaq, skena e krimit, e ideuar dhe urdhëruar nga Edi Rama, parathotë fundin e tij të pashmangshëm, që do të jetë i njëjtë me fundin që meritojnë të gjithë ata që i kundërvihen popullit të tyre, të gjithë ata që u shërbejnë interesave të krimit në dëm të interesave kombëtare.
Dhimbja dhe lotët e nënave dhe fëmijëve që mbetën pa shtëpi dhe e baballarëve të dhunuar në sy të fëmijëve, për të ushqyer metastazat kanceroze të korrupsionit dhe krimit të maxhorancës së votave të vjedhura nga bandat e krimit, do të bëhen shumë shpejt, mallkimi dhe ndëshkimi mbi Edi Ramën dhe bandën e tij të pushtetit!
Në solidaritet të plotë me banorët e Unazës së Re, ju jap fjalën e zemrës me gjithë dashurinë e nënës, por edhe si Kryetare e LSI-së, se do të marrin një më një të gjithë kompensimin për dëmin e shkaktuar dhe se Edi Rama dhe e gjithë banda e tij do të përgjigjen para drejtësisë së ligjit!”.
(Kosova Sot Online)
