Kërkohet Vetting-u i menjëhershëm në Kosovë

18 November 2019 - 07:25

Krimi i organizuar dhe korrupsioni, vazhdojnë të mbeten “sëmundje” e pashërueshme e cila nuk po e lë të zhvillohet, por po e shkatërron shtetin e ri të Kosovës.

Kështu thotë për “Kosova Sot Online”, njohësi i fushës së të drejtësisë Skënder Kapiti, i cili kërkon që për ta vendosur rendin dhe ligjin, institucionet e reja pas zgjedhore në Republikën e Kosovës, duhet ta trajtojnë me prioritet dhe pa vonesë miratimin e ligjit Vetting.

Duke e miratuar një ligj të tillë, sipas Kapitit do të fillohej menjëherë një proces hetimor në shkallë të gjerë në të gjitha institucionet shtetërore të Kosovës.

“Pasi që foletë e krimit dhe korrupsionit janë pikërisht në këto institucione të instrumentalizuara nga krimi i organizuar, kështu që ndodhur VETTING-u në drejtësi, por edhe në politikë, nuk ka shans që në Kosovë të ketë sundim të ligjit , që do t`ia këpuste kokën krimit të organizuar dhe korrupsionit, në të gjitha institucionet e shtetit, por sidomos në sistemin e drejtësisë në Kosovën e nëpërkëmbur dhe të kapur nga krimi!”.

“Fakti që nuk ka llogaridhënie nga institucionet e Kosovës, as ato të qeverisjes dhe as ato të drejtësisë , ky fakt është argument i asaj se zyrtaret e lartë shtetëror, qeveritarët, gjyqtarët e prokurorët i trajtojnë shtetin, pushtetin dhe ligjin si dhe institucionet e tyre si pasuri e prona private me të cilat bëjnë, veprojnë e sillën si të duan, pasi nuk e kanë frikë as drejtësinë dhe as ligjin. Të mos japësh llogari për shkeljet e rënda ligjore, të bësh krimin e korrupsionit dhe atë gjyqësor kur e ke për detyrë që të zbatosh ligjin, dhe e ke për detyrë të japësh drejtësinë dhe t'i shërbesh shtetit dhe qytetarit; e nga ana tjetër edhe e shfrytëzon postin shtetëror, si privilegj dhe si të drejtë për t'u pasuruar në mënyrë kundërligjore ky është dhe përbënë krim shtetëror, krim në emër të shtetit dhe të Republikës. Ku e gjejnë guximin këta aparatcikë e mafiozë që të dalin mbi ligjin dhe mbi drejtësinë”, tha Kapiti për “Kosova Sot Online”.

Sipas Kapitit, guximi i tyre për ta kapur shtetin kështu, buron nga fakti se paraprakisht krejt sistemin, drejtësinë, politikën, pushtetin, paranë publike dhe ekonominë i kanë privatizuar, prandaj kërkohet ligji Vetting.

“Nga kjo gjendje nuk dilet pa u reformuar sistemi, i gjithë sistemi, pa u reformuar sidomos sistemi gjyqësor, pa një VETTING të thellë e radikal të të përmasave të tilla sa që duhet shkrirë i gjithë sistemi, që kupton dëbimin dhe pastrimin e tij nga të gjithë gjyqtarët e prokurorët aktual. Pa një VETTING të bërë, të kontrolluar e të monitoruar nga SHBA nuk reformohet as drejtësia dhe as shteti e për rrjedhojë as nuk do të funksionojnë ato”, shtoi Kapiti për “Kosova Sot Online”.

Sipas tij shpresa e vetme për ta pastruar tërësisht politikën, drejtësinë dhe të gjitha nivelet e institucioneve të Kosovës nga rrjeti I krimit të organizuar, mbetet ligji Vetting, të cilin e kanë premtuar se do e bëjnë në fillim të mandatit qeverisës dy subjektet politike opozitare të mandatit të kaluar, LVV dhe LDK.

“Nëse qeverisja e dalë pas 6 TETORIT 2019, nuk merret me dekriminalizimin e drejtësisë dhe të politikës ajo detyrimisht që do të dështojë, dhe Kosovës do t’i duhen patjetër zgjedhje të parakohshme. Nuk mashtrohet më publiku Kosovar me parulla, slogane e premtime në emër të patriotizmave false. Nuk duron më populli mashtrime e premtime gënjeshtrash për të mbuluar korrupsionin dhe tradhtitë publike e kombëtare. Prandaj reforma në drejtësi, në politikë, në qeverisje dhe kudo në institucione dhe në administratën publike dhe në pushtetin vendor duhet realizuar pasi kjo Reformë është jetike, si krye reforma e cila do ta reformojë e konsolidojë shtetin e Kosovës, shoqërinë dhe demokracinë dhe do të përshpejtojë liberalizimin e vizave dhe integrimin e Kosovës në BE,” përfundoi Skënder Kapiti për “Kosova Sot Online”.

(Kosova Sot Online)