Qeveria holandeze fiton gjyqin kundër riatdhesimit të fëmijëve të ISIS’it

  • 22 November 2019 - 18:51
Qeveria holandeze fiton gjyqin kundër riatdhesimit të fëmijëve të ISIS’it

Gjykata e Apelit e Holandës e përmbysi një vendim të një gjykate të qarkut që thoshte se qeveria duhet të ndihmojë riatdhesimin e fëmijëve të grave që i janë bashkuar grupit militant Shteti Islamik (IS) në Siri.

Njëzetetri gra kanë nisur një proces gjyqësor në fillim të këtij muaji, duke kërkuar që Holanda t’i kthejë ato dhe 56 fëmijët e tyre nga kampet e paraburgimit në Siri.

Një gjykatë e qarkut në Hagë vendosi në favor të tyre më 11 nëntor, duke e urdhëruar qeverinë që t’i ndihmojë “në mënyrë aktive” fëmijët, por jo nënat.

Por, Gjykata e Apelit tha se kjo është një çështje politike dhe se me të nuk mund të merret një gjykatës. 

Kryeministri i Holandës, Mark Rutte, e lavdëroi vendimin e Gjykatës së Apelit, duke thënë se “është e çuditshme që një gjykatë ka ndërhyrë në politikën e jashtme”.

“Ato (gratë) duhet të gjykohen në rajon. Ky është këndvështrimi im. Unë nuk i kam dërguar këta fëmijë në Siri. Kanë qenë prindërit e tyre që kanë ndërmarrë një vendim të tillë qesharak”, tha Rutte.

Turqia ka nisur dëbimin e xhihadistëve të huaj këtë muaj dhe i ka kritikuar vendet perëndimore që refuzojnë t’i riatdhesojnë shtetasit e tyre që kanë luftuar për Shtetin Islamik në Siri dhe Irak.

(Kosova Sot Online)