Rama apel ndërtuesve: Merrni përsipër riparimet, ndryshe ju pret burgu

  • 02 December 2019 - 10:48
Rama apel ndërtuesve: Merrni përsipër riparimet, ndryshe ju pret burgu

Në mbledhjen e jashtëzakonshme të qeverisë, mëngjesin e sotëm, kryeministri Rama i bëri edhe njëherë apel ndërtuesve të pallateve.

Ai lajmëroi ashpërsimin e ligjit, duke kujtuar edhe burgun. Rama kërkoi që ndërtuesit të marrin përsipër të gjithë riparimin dhe dëmet materiale që u janë shkaktuar njerëzve, ndryshe i pret burgu, një dënim nga 7 deri në 15 vite burg.

‘Sanksionet do të jenë të ashpra dhe shumë të egra, njëlloj si tërmeti’, tha Rama.

‘Jemi duke punuar dhe besojmë se do ta konkludojmë shpejt dhe kuadrin e ri ligjor dhe penal për abuzimet në ndërtim. Njësia speciale kundër korrupsionit ka filluar të përgatisë gjithë hartën e veprimeve për të identifikuar përgjegjësi në godinat problematike.

Dua të bëj një apel për të gjithë ata që kanë ndërtuar godina kolektive dhe sot hyjnë te godinat e dëmtuara por jo të rrezikshme që të paraqiten vetë urgjentisht në zyrën përkatëse të drejtuesit të plotfuqishëm për emergjencën apo zyrën e shtabit të emergjencës në Durrës dhe të bëjnë deklaratën e gatishmërisë për ti paguar një më një vetë godinat, të gjitha riparimet nga ato sipërfaqësore deri te dëmet materiale që i janë shkaktuar njerëzve.

E bëj këtë apel sepse shumë shpejt do të jetë vonë për ta. Kush do t’i shmanget këtij detyrimi do të jetë i akuzuar drejtpërdrejt përpara organeve të drejtësisë, do ta çojmë ne në akuzë dhe do të kërkojmë burgim për papërgjegjshmëri. Bëhet fjalë për dëmtime që nuk kërcënojnë qëndrueshmërinë e godinës, por që vënë në pamundësi banueshmërinë e saj dhe që kanë të bëjnë me abuzime të ardhura pas,  gjatë ekzekutimit të lejes së ndërtimit.

Është e vërteta e sigurt që ndërtimet e reja të bëra që nga mesi i viteve ’90 dhe pas, 99% e tyre kanë qëndruar më së miri. Pjesa tjetër, shumë e vogël, në 99% të rasteve është abuzivizëm nga individë dhe jo kompani që kanë ndërtuar shto ujë dhe shto miell dhe në një përqindje të vogël nga kompani që kanë abuzuar me vetë lejen’, nënvizoi Rama.

(Kosova Sot Online)