Sot shi dhe borë në Kosovë

  • 03 December 2019 - 08:10
Sot shi dhe borë në Kosovë

Gjatë ditës së sotme në Kosovë do të ketë reshje të përziera të shiut dhe të borës, kanë njoftuar meteorologët.

“Një front i ftohtë që po sjell masa të ftohta polare nga veriu i kontinentit pritet të kalojë sonte dhe ditën e nesërme mbi vendin tonë. Gjatë natës dhe herët në mëngjes priten reshje të përziera shiu dhe bore, që me rënien e temperaturave do të shndërrohen në reshje bore, ku kohëpaskohe pritet të vazhdojnë deri në orët e pasdites. Deri nga mbrëmja reshjet pritet të pushojnë. Reshjet e borës pritet të krijojnë shtresë bore edhe në vise të ulëta, derisa në vise malore do të ketë rritje të shtresës së borës, që është formuar nga reshjet e ditëve të fundit”, thuhet në njoftim.

Nga dita e mërkurë mbi rajon do të shtrihen zona anticiklonike, që do të favorizojnë mot më stabil, me intervale më të gjata me diell por të ftohtë, e me ngrica në orët e mëngjesit.

Ditën e martë, cilësia e ajrit pritet të përmirësohet ku vlerat do të sillen përreth vlerave mesatare, mirëpo me shtrirjen e anticiklonit mbi rajon nga dita e mërkurë, nuk parashihet të ketë qarkullim të mjaftueshëm ajror, ndaj vlerat e cilësisë së ajrit do të kalojnë në vlera të pashëndetshme.

“Ftohtë dhe kryesisht vranët. Herët në mëngjes reshje shiu dhe bore, që më pas do të shndërrohen në borë. Pasdite dhe në mbrëmje reshjet pritet të pushojnë. Erë mesatare dhe mesatarisht e fuqishme nga verilindja 5-12m/s”, thuhet në njoftim.

(Kosova Sot Online)