Lutfi Haziri: Keni durim, po e ndërtojmë koalicionin në mirëbesim

Nënkryetari i dytë i LDK’së, Lutfi Haziri, ka hedhur poshtë zërat se po dështon lidhja e një koalicioni qeverisës LDK-VV.

“Ne kemi punuar më shumë se dy vite për të ndërtuar kapitullin e bashkëpunimit dhe mirëkuptimit politik mes LDK’së dhe LVV’së”, ka shkruar Haziri në llogarinë e tij në Facebook.

“Keni durim. Po e ndërtojmë koalicionin në mirëbesim”

Tutje, kryetari i Gjilanit ka thënë se kjo do të jetë një marrëveshje me qëllime më afatgjata se sa vetëm një mandat qeverisës, si dhe do të ketë përkujdesje që të mos ketë të çara në koalicion.

“Kjo ka me qenë marrëveshje përtej një mandati. Nuk ka të bëj me emrat e përveçëm, porme qartësime të pozitave dhe ndarje të drejtë e me vullnet të mirë, në mënyrë që në qeverinë LDK-LVV të mos ketë ‘bomba të kurdisura”, ka shtuar ai.

Ndryshe LDK dhe VV kanë qenë dy partitë më të votuar në zgjedhjet e 6 tetorit, dhe që të dyjat kanë ardhur nga opozita e legjislacionit të kaluar ku kanë pasur një bashkëpunim të theksuar.

Javëve të para pas zgjedhjeve, grupet punuese të të dy subjekteve janë marrë vesh për programin qeverisës por të hënën kanë dalë problemet në ndarjen e posteve si dhe në diskutimin për postin e presidentit. 

(Kosova Sot Online)