Mirënjohje për Ministrinë e Infrastrukturës dhe Transportit nga Ambasada e Shqipërisë në Kosovë

  • 14 dhjetor 2019 - 09:37
Mirënjohje për Ministrinë e Infrastrukturës dhe Transportit nga Ambasada e Shqipërisë në Kosovë

Ministri i Infrastrukturës dhe Transportit, Pal Lekaj, të premten ka pritur në takim Ambasadorin e Shqipërisë në Kosovë, Qemal Minxhozi, nga i cili ka pranuar mirënjohje për solidaritetin dhe kontributin e dhënë shtetit shqiptar, në përballjen e dëmeve nga tërmeti i 26 nëntorit.

Lekaj, duke ndjerë keqardhje për ngjarjen e rëndë e cila goditi Shqipërinë muajin e kaluar, deklaroi se mirënjohja e pranuar nga Minxhozi, u takon inxhinierëve të ndërtimtarisë së MIT-së dhe profesorëve të UBT-së, të angazhuar në vlerësimin e dëmeve të shkaktuara nga ky tërmet, me ç’rast, ambasadorit i dorëzoi edhe një raport të detajuar të punës së bërë dhe konstatimin e gjendjes nga ana tyre.

MIT, në bashkëpunim me kolegjin UBT dhe në koordinim të plotë me Ambasadën e Shqipërisë në Kosovë, i ka ofruar ndihmë Republikës së Shqipërisë, me angazhimin e 14 inxhinierëve të ndërtimtarisë dhe 12 profesorëve të UBT-së, të cilët në mënyrë profesionale, kanë kontribuar në vlerësimin e dëmeve të shkaktuara, të dalë me një raport, i cili do t’u shërbejë në rikuperimin e gjendjes.

(Kosova Sot Online)