Së paku 20 të vdekur në aksidentin mes autobusit dhe kamionit

Të paktën 20 persona kanë mbetur të vdekur nga përplasja mes një autobusi dhe një kamioni mallrash në pjesën lindore të Guatemalës të shtunën. Mjekët njoftuan se në mesin e viktimave ishte edhe një fëmijë 7 vjeç.

Presidenti i porsazgjedhur i këtij shtetit, Alejandro Giammattei, u shpreh i pikëlluar për viktimat përmes një postimi në Twitter. 

Aksidenti i rëndë ndodhi afër qytezës Gualan, afër bregdetit të Atlantikut. Merret vesh se autobusi ishte duke udhëtuar drejt qytetit Santa Elena, afër kufirit me Meksikën.

Ende nuk dihet shkaktari i aksidentit, por autoritet pritet t’i nisin hetimet për rrethanat e fatkeqësisë.

Guatemala është një shtet i vogël, i shtrirë në pjesën jugore të Amerikës Veriore. Ajo ka dalje në Oqeanin Paqësor dhe Oqeanin Atlantik, shkruan “Reuters”.

(Kosova Sot Online)