Trump: Jam i gatshëm për çfarëdo “dhurate” nga Koreja Veriore

Zyrtarët ushtarakë amerikanë thonë se presin testime të reja të raketave balistike nga Koreja Veriore gjatë Krishtlindjeve. Megjithatë, presidenti Trump po pret dhuratë nga vendi komunist.

“Ndoshta është një dhuratë e bukur”, tha presidenti Trump, kur u pyet se si do të reagonte ndaj Pjongyangut, nëse Koreja Veriore do të testonte raketa balistike gjatë festave.

“Ndoshta lideri i Koresë Veriore do të ma dërgojë një vazo me lule të bukura, e jo test të raketave. Mund ta marr një vazo. Mund ta marrë një dhuratë të mirë prej tij. Nuk dihet, kurrë nuk dihet”, shtoi kreu i Shtëpisë së Bardhë.

Deklarata e tij ishte reagim optimist dhe paksa qesharak ndaj kërcënimit të Koresë Veriore se do t’ia japë Shteteve të Bashkuara një dhuratë për Krishtlindje, nëse nuk shënohet përparim për largimin e sanksioneve amerikane ndaj programit bërthamor të vendit aziatik.

Koreja Veriore ka deklaruar më parë se i ka kryer disa teste të raketave në një qendër për lëshimin e satelitëve gjatë këtij viti. Komandanti i Forcave Ajrore të Paqësorit tha se është e mundur që Koreja Veriore të lëshojë raketë me rreze të gjatë veprimi gjatë festave të fundvitit.

Ky shtet i ka dhënë afat Shteteve të Bashkuara që deri në fund të vitit të paraqesë propozim të ri për lehtësimin ose tërheqjen e sanksioneve para se të marrë masa të reja për programin e vet bërthamor, shkruan “CNN”.

(Kosova Sot Online)