Talibanët vrasin dy ushtarë amerikanë në Afganistan

  • 12 janar 2020 - 11:24
Talibanët vrasin dy ushtarë amerikanë në Afganistan

Dy pjesëtarë të forcave të armatosura të Shteteve të Bashkuara kanë vdekur të shtunën pas shpërthimit të një bombe në Afganistan.

Përpos ushtarëve të vdekur, dy të tjerë u plagosën nga bomba që shpërtheu në provincën Kandahar, bëri të ditur misioni i NATO-s në Afganistan.

Trupat e sulmuara ishin duke e kryer një patrullë afër aeroportit të Kandaharit, tha zëdhënësi policor, Jamal Nasir Barkzai. 

Përgjegjësinë për sulmin e morën talibanët. Zëdhënësi i këtij grupi, Zabihullah Mujahid, tha se bomba e ka shkatërruar automjetin e amerikanëve, duke i lënë të vdekur të gjithë personat që ndodheshin në të.

Dhuna në Afganistan zakonisht pakësohet gjatë dimrit. Megjithatë, talibanët këtë vit kanë zhvilluar shumë operacione, pavarësisht reshjeve të mëdha të borës në zonat malore.

Shtetet e Bashkuara janë duke zhvilluar bisedime me talibanët për t’i dhënë fund luftës së gjatë në këtë shtet, shkruan “France24”.

(Kosova Sot Online)