Ish-deputeti i LDK-së kryen operacion të zemrës në Shkup

  • 28 janar 2020 - 18:11
Ish-deputeti i LDK-së kryen operacion të zemrës në Shkup

Ish-deputeti i Lidhjes Demokratike të Kosovës dhe ish-kandidati për kryetar të komunës së Prizrenit, Dr. Hatim Baxhaku, ka kryer një intervenim në zemër.

Baxhaku, i cili është vet kirurg me profesion, ia ka besuar intervenimin në zemër kardiokirurgut maqedonas Zan Mitrev. Siç bëhet e ditur gjendja shëndetësore e Baxhakut është e mirë, ka raportuar tv opoja. Intervenimi është kryer në klinikën ‘Zan Mitrev’ në Shkup.

Kujtojmë se në Qendrën Klinike Universitare të Kosovës që dy vjet është funksionalizuar me orar 24 orë Klinika e Kardiokirurgjisë me Kardiologji Invazive. Në këtë klinikë kryhen operacione në zemër të hapur.

Përveç kësaj në disa spitale private kardiokirurg të njohur kosovar kryejnë pothuajse të gjitha llojet e operacioneve në zemër.

Kujtojmë se kjo nuk është hera e vetme kur politikanët kërkojnë shërim në institucione shëndetësore jashtë Kosovës. 

Rreth këtij lajmi ka reaguar edhe kryetari i Shoqatës për Mbrojtjen e të Drejtave të Pacientëve, Besim Kodra.

Kodra i ka uruar shërim të shpejt Baxhakut, por ka thënë se është e dhimbshme për një doktor që jetën e ka kaluar në spitalet publike, të kryej operacionin në privat e aq më tepër jashtë Kosovës.

Reagimi i plotë i Kodrës:

Doktor Hatim Baxhaku qenka operuar nga Zhan Mitrev dhe qenka më mirë me shëndet. Jam i lumtur që është më mirë me shëndet!

I dhimbshëm është fakti se një doktor që jeten e tij e ka qu në Spital Publik, ka qenë edhe Deputet, operimin nuk e kryen në spital publik , por në një privat, aq më keq një spital të huaj!

E vërteta është se prej Hashimit e te poshtë, krejt keni me pasë fatin e Doktor Hatimit nëse gjërat vazhdojnë kështu në shëndetësi.

E një gjë nuk është mirë me harru të gjith politikanët, që këta njerëzit e “patikave” që u kanë votuar juve, nuk i kanë mundësitë të shkojnë në spitale private!

Doktorrit i uroj shërim më të shpejtë. Qoftë e shkuar!

Image

(Kosova Sot Online)