Policia e Kosovës demanton Behgjet Pacollin, konfirmojnë se dërguan gaz lotsjellës në Shqipëri

  • 11 shkurt 2020 - 15:00
Policia e Kosovës demanton Behgjet Pacollin, konfirmojnë se dërguan gaz lotsjellës në Shqipëri

Policia e Kosovës përmes një komunikate për media ka konfirmuar huazimin e gazit lotsjellës Policisë së Shtetit të Shqipërisë.

Në këtë komunikatë, ata demantuan edhe ish ministrin e punëve të jashtme, Behgjet Pacollin, i cili më herët tha se nuk ishte i përfshirë në këtë rast.

“Huazimi i gazit lotsjellës fillimisht është bazuar në Marrëveshjen e Bashkëpunimit në mes të dy institucioneve policore, si dhe mbi pëlqimin e realizuar nga të dy ministritë kompetente, ajo e Punëve të Brendshme dhe e Punëve të Jashtme e Republikës së Kosovës”, thuhet ndër tjera në komunikatën e Policisë së Kosovës.

Komunikata e plotë:

INFORMACION PËR MEDIA

Informacion nga Policia e Kosovës lidhur me huazimin e gazit lotsjellës Policisë së Shtetit të Shqipërisë

Prishtinë, 11 shkurt 2020
Policia e Kosovës, përmes këtij informacioni zyrtar, informon opinionin publik dhe mediat lidhur me huazimin e gazit lotsjellës Policisë së Shtetit të Shqipërisë që është realizuar në vitin e kaluar.

Huazimi i gazit lotsjellës fillimisht është bazuar në Marrëveshjen e Bashkëpunimit në mes të dy institucioneve policore, si dhe mbi pëlqimin e realizuar nga të dy ministritë kompetente, ajo e Punëve të Brendshme dhe e Punëve të Jashtme e Republikës së Kosovës.

Në aspektin ligjor paraprakisht janë marrë mendimet pozitive edhe nga ana e Zyrës Ligjore të Ministrisë së Punëve të Brendshme të RKS-se dhe e Policisë së Kosovës, përfshirë edhe pëlqimin e dhënë nga ana e kompanisë prodhuese të gazit lotsjellës.

Bazuar në procedurat e parapara ligjore, marrëveshjen e bashkëpunimit të hartuar mbi bazën ligjore, pëlqimin dhe autorizimin e ministrive kompetente, pëlqimin e kompanisë dhe mendimin pozitiv të zyrave ligjore, është bërë huazimi i gazit lotsjellës.

Mbi bazën e bashkëpunimit ndërinstitucional, me shtetet fqinje në këtë rast jo vetëm me Shqipërinë, Policia e Kosovës shkëmben personel policorë, patrullime dhe trajnime të përbashkëta si dhe pajisje logjistike sipas nevojës.

Policia e Kosovës, inkurajon mediat dhe gazetarët që para publikimit të informacioneve, t’i drejtohen policisë, për sqarimin e informacioneve dhe marrjen e informatave zyrtare, në mënyrë që të ketë informim të drejtë të opinionit publik, sepse të gjitha veprimet e ndërmarra janë realizuar sipas ligjeve në fuqi.

(Kosova Sot Online)