Osmani: Thellësisht e prekur nga ngjarja tragjike në Gjilan, organet të marrin masa për të shmangur raste të tilla

Kryeparlamentarja Vjosa Osmani ka reaguar pas vrasjes së shumëfishtë që ndodhi sot në Gjilan.

Përmes një postimi në llogarinë e saj në Facebook, Osmani ka thënë se është thellësisht e prekur nga kjo ngjarje tragjike, derisa ka thënë se organet kompetente duhet të marrin masa urgjente për të shmangur rastet si ky.

“Thellësisht e prekur nga ngjarja tragjike në Gjilan. Mendimet dhe lutjet e të gjithë neve që u trishtuan nga kjo tragjedi do të jenë me viktimat dhe familjen e tyre në këtë orë të ligë. Organet kompetente duhet të marrin masa urgjente për të shmangur rastet si ky”, ka shkruar Osmani.

Ndryshe, rastin e ka konfirmuar Prokuroria Themelore e Gjilanit përmes një komunikate drejtuar mediave.

 “Sipas informatave të para, dyshohet se në lagjen ‘’Bujanina’’, në Gjilan, e ndjera V.B., zyrtare policore, në kuadër të Stacionit Policor në Gjilan, me armë zjarri ka privuar nga jeta dy prindërit dhe dy vëllezërit e saj, ndërsa, pastaj ka kryer vetëvrasje”, thuhet në komunikatën e prokurorisë.

(Kosova Sot Online)