Dyshohet se dikush ia vuri flakën një veture, digjen tre fëmijë në Australi

  • 19 February 2020 - 08:29
Dyshohet se dikush ia vuri flakën një veture, digjen tre fëmijë në Australi

Policia australiane ka njoftuar se katër persona, përfshirë tre fëmijë, kanë vdekur pasi dikush besohet se qëllimisht ia vuri flakën veturës në të cilën ndodheshin viktimat. Ngjarja e rëndë ndodhi në qytetin Brisbane.

Autoritetet policore të rajonit Queensland thanë se të gjithë fëmijët ishin nën moshën 10-vjeçare dhe ata u gjetën të vdekur në kohën kur në vendin e ngjarjes arriti ekipi i emergjencës.

“Është një skenë e tmerrshme. Hetimet janë në fazë të hershme, por vetura ishte e përfshirë tërësisht nga zjarri kur arriti policia”, tha hetuesi Mark Thompson.

Mjekët njoftuan se e kanë trajtuar edhe një kalimtar të rastit, i cili, duke u përpjekur t’i shpëtonte njerëzit nga zjarri, kishte pësuar djegie në fytyrë.

Dëshmitarët thanë se e panë një grua duke dalë nga vetura dhe se trupi i saj ishte i përfshirë nga zjarri, shkruan “BBC”.

Për këtë rast ka reaguar edhe kryeministri i Australisë, Scott Morrison, i cili tha se me zemër është pranë familjeve të viktimave dhe komunitetit, duke bërë thirrje që të kërkohet ndihmë nga të gjithë ata që kanë nevojë në lidhje me këtë tragjedi.

(Kosova Sot Online)