Koronavirusi shkakton rënie prej 4 për qind të çmimit të naftës
Çmimi i karburanteve në bursën ndërkombëtare të hënën ra për 4 për qind. Kjo rënie erdhi pas përhapjes së shpejtë të koronavirusit jashtë Kinës, përfshirë rastet në Korenë Jugore, Iran dhe Itali.
Rënie pati edhe në vlerën e aksioneve në tregjet globale për shkak të shqetësimeve në lidhje me ndikimin e koronavirusit në tregti. Çmimi i një fuçie naftë në tregun botëror ra për 4.1 për qind në 56.13 dollarë.
“Zhvillimet e fundjavës na përkujtuan qartazi se koronavirusi është tash për tash një forcë e pandalshme”, tha Tamas Varga, analist i tregut të karburanteve.
Qyteti i Koresë Jugore, Daegu, është vendosur nën masa të rrepta të izolimit për shkak të rritjes së numrit të personave të infektuar. Deri më tash, në shtetin e largët kanë vdekur shtatë persona, prandaj autoritetet e kanë aktivizuar alarmin e kuq.
Virusi i ri ka vazhduar të përhapet edhe në Lindjen e Mesme, përfshirë Afganistanin, Kuvajtin dhe Iranin, shkruan “Reuters”.
Sidoqoftë, pak stabilitet për tregun e karburanteve ofroi vendimi i katër provincave kineze për lehtësimin e masave të izolimit.
(Kosova Sot Online)