Gjendje kritike në Korenë Jugore, 219 raste të koronavirusit për pak orë

  • 29 February 2020 - 11:43
Gjendje kritike në Korenë Jugore, 219 raste të koronavirusit për pak orë

Autoritetet në Korenë Jugore kanë raportuar për 219 raste të reja të koronavirusit brenda pak orëve. Ky numër i shtohet shifrës prej 594 personave të infektuar më parë gjatë ditës, duke e çuar në 813 numrin e përgjithshëm të infektimeve vetëm të shtunën.

Organet shtetërore bënë thirrje që njerëzit të qëndrojnë në shtëpitë e tyre gjatë fundjavës në mënyrë që të pakësohet rreziku për përhapje të koronavirusit.

Ndryshe, shtatë persona kanë vdekur nga virusi i ri në këtë shtet deri më tani.

Shumica e rasteve të reja të koronavirusit Covid-19 u konfirmuan në qytetin Daegu, që shtrihet në pjesën juglindore të vendit dhe që ka qenë epiqendër e virusit.

Në mbarë botën, deri tash janë infektuar më shumë se 83 mijë persona, shumica në Kinë, ku 2791 njerëz kanë vdekur, shkruan “BBC”.

Rastet e para të koronavirusit së fundi u konfirmuan edhe në Bjellorusi, Lituani, Holandë, Zelandë të Re dhe Nigeri. Shumë shtete kanë vendosur masa të rrepta të kontrollit dhe kufizime të konsiderueshme në sektorin e udhëtimeve.

Kryetari i Organizatës Botërore të Shëndetësisë, Tedros Adhanom, tha se frika dhe keqinformimi janë dy ndër sfidat më të mëdha që po ndikojnë për të keq në luftën kundër koronavirusit.

(Kosova Sot Online)