Shteti për të cilin pretendon Daçiq, e ka njohur Kosovën në vitin 2008

  • 03 March 2020 - 09:58
Shteti për të cilin pretendon Daçiq, e ka njohur Kosovën në vitin 2008

Ministri i Jashtëm i Serbisë, Ivica Daçiq pretendon se shteti i Sierra Leones ka tërhequr njohjen e pavarësisë së Kosovës.

Siç shkruan Agjencia serbe e Lajmeve Tanjug, Ivica Daçiq po qëndron për vizitë zyrtare në këtë vend, nga ku kumtoi lajmin.

Daçiq deklaroi se kjo “tërheqje” e njohjes së Kosovës kishte një rëndësi të veçantë për Beogradin pasi Sierra Leone ishte ndër vendet e para që njohu pavarësinë e Kosovës më 2008.

Në listën e njohjeve figuron se Sierra Leone është ndër vendet e para që e ka njohur pavarësinë e Kosovës, pikërisht më 11 qershor të vitit 2008. Kështu më 2008 ai ishte bërë shteti i 43-të që kishte njohur Kosovën.

Republika e Sierra Leones, është një vend në bregdetin jug-perëndimor të Afrikës Perëndimore. Kufizohet nga Liberia në juglindje dhe Guinea në verilindje.

Nga Ministria e Punëve të Jashtme të Kosovës ende nuk ka ndonjë reagim nëse ky shtet vërtetë e ka tërhequr njohjen e Kosovës.

Ndryshe, për tërheqje të reja të njohjeve paralajmëroi dje edhe Presidenti i Serbisë Aleksandar Vuçiq i cili po qëndron në Washington.

Vuçiq u tha gazetarëve se Beogradi do të kërkojë çnjohjen e Kosovës, derisa njohja nga Serbia për Kosovën nuk do të ndodh.

(Kosova Sot Online)