Bernie Sanders do ta vlerësojë fushatën pas humbjeve të fundit

  • 18 March 2020 - 15:09
Bernie Sanders do ta vlerësojë fushatën pas humbjeve të fundit

Zyrtarët e fushatës së kandidatit për president të Shteteve të Bashkuara, Bernie Sanders, kanë thënë se politikani do ta vlerësojë aktivitetin e deritashëm.

Menaxheri i fushatës së Sanders-it, Faiz Shakir, përmes një deklarate tha: “Gara e ardhshme brenda partisë është së paku tri javë larg. Senatori Sanders do të zhvillojë biseda me përkrahësit e tij për ta vlerësuar fushatën. Në ndërkohë, megjithatë, ai do të jetë i përqendruar në përgjigjen e qeverisë ndaj përhapjes së koronavirusit dhe për t’u siguruar që ne do të kujdesemi për njerëzit që punojnë, që janë më të rrezikuarit.”

Kjo deklaratë erdhi pasi kandidati tjetër, Joe Biden, shënoi fitore të rëndësishme në Arizona, Florida dhe Illinois, shkruan “The Guardian”.

Përmes një fjalimi të transmetuar me video-lidhje, ish-nënpresidenti amerikan tha se ai dhe Sanders-i kanë pasur qëllime të përbashkëta në lidhje me kujdesin shëndetësor, pabarazinë dhe krizën klimatike, duke i lavdëruar përkrahësit e kundërkandidatit për pasion dhe vendosmëri.

Deri në këtë fazë të garës, Joe Biden është në epërsi të konsiderueshme dhe tashmë po vlerësohet si kandidat favorit për të qenë i nominuari i Partisë Demokratike për zgjedhjet presidenciale të nëntorit.

Ndryshe, ai njihet si mik i Kosovës dhe i ka dhënë përkrahje vendit tonë gjatë mandatit të ish-presidentit Barack Obama.

(Kosova Sot Online)