Drejtoresha e QKMF’së në Viti: Do qëndrojmë edhe katër ditë në vetizolim

  • 23 March 2020 - 12:47
Drejtoresha e QKMF’së në Viti: Do qëndrojmë edhe katër ditë në vetizolim

17 punëtorë të QKMF’së në Viti, përfshirë edhe drejtoreshën, po vazhdojnë që të qëndrojnë në vetizolim, meqenëse të njejtit kanë pasur kontakt me ambientin ku është trajtuar 77-vjeçari nga Vitia, i cili është i infektuar me koronavirus. Pavarësisht se testet e tyre kanë dalë negative, atyre iu duhet që të qëndrojnë edhe katër ditë në karantinë.

Për gjendjen e personelit shëndetësor ka dhënë detaje Drejtoresha e Qendrës Kryesore të Mjekësisë Familjare në Viti, Vjollca Kadolli.  

 “Gjendja e të gjithëve është e mirë. Asnjë prej nesh nuk ka pas ndonjë shqetësim. Por, po vazhdojmë të jemi në vetizolim, meqenëse duhet të zbatojmë rekomandimin e 14 ditëshit. Kemi me qëndru edhe 4 ditë”, ka thënë ajo për media.

Kadolli ka treguar se do të qëndrojnë në shtëpitë ku janë vendosur edhe për katër ditë. Fillimisht, atyre komuna u kishte sjellë ushqim, por tash thotë se po përgatitin vetë.

Sipas saj, i vetmi që ende ushqehet nga autoritetet komunale është mjeku i cili e kishte kontrolluar fillimisht pacientin e parë me koronavirus.

“Në fillim na kanë sjellë ushqim komuna, pastaj pasi kemi shku nëpër shtëpia s’kemi pranu vet – përpos atij që është në QKMF që i dërgojnë. Ne komplet të tjerët s’kemi dashtë me na furnizu, pasi jetojnë afër shtëpive të tyre, në shtëpi private që kanë qenë të pabanuara (pronarët jashtë shtetit na i kanë lëshu shtëpitë e tyre), kurse disa janë në shtepitë e tyre në vetizolim”, ka thënë Kadolli.

Ndryshe, actualisht në gjithë vendin janë të infektuar 33 persona me COVID-19. Më 22 mars në Kosovë u konfirmua viktima e parë nga koronavirusi.

Instituti Kombëtar i Shëndetit Publik njoftoi se viktima është një pacient 82 vjeç nga Dumnica e Podujevës.

(Kosova Sot Online)