Ymeri tallet me reciprocitetin e Kurtit: Koalicioni u prish për certifikatat fitosanitare
Lidhja Demokratike e Kosovës dhe Lëvizja Vetëvendosje gjatë gjithë ditëve sa kanë qeverisur bashkë nuk ishin pajtuar rreth modalitetit të heqjes së taksës. Mustafa insistonte që ajo të hiqej pa asnjë kusht shtesë, derisa Kurti insistonte që ajo të zëvëndësohej me masën e reciprocitetit. Një mospajtim i tillë çoi në rrëzimin e Kurtit me mocion mosbesimi në Kuvend, i cili mori përkrahjen e 82 deputetëve.
Ndërsa tani Kurti si kryeministër në detyrë, siç kishte deklaruar, ka hequr taksën 100% ndaj Serbisë dhe e ka zëvëndësuar atë me reciprocitet të pjesshëm.
Me një vendim të tillë të kryeministrit është tallur ish-kreu i Vetëvendosjes, Visa Ymeri, i cili thotë se koalicioni qenka prishur vetëm që certifikatat fitosanitare dhe ato veterinare të mallit të jenë në përputhje me Kushtetutën e Kosovës.
“A për këtë u prish koalicioni a? Që çertifikatat fitosanitare dhe ato veterinare të mallit të jenë në përputhje me Kushtetutën dhe legjislacionin në fuqi?”, ka pyetur me ironi Ymeri.
Ai në fund ka pyetur edhe një herë se për çfarë ishin pajtuar LDK-ja dhe VV-ja, nëse nuk janë pajtuar rreth certifikatave të fitosanitarisë.
“Edhe një herë: për çka janë marrë vesh LVV dhe LDK nëse për këtë nuk qenkan marrë vesh”, ka përfunduar Ymeri.
Kreu në detyrë i Qeverisë mbrëmë të martën në një konferencë për media kishte kumtuar lajmin për heqjen e taksës 100 % dhe për zëvëndësimin e saj me masën e reciprocitetit të pjesshëm.
A për këtë u prish koalicioni a?
— Visar Ymeri (@VisarYmeri) April 1, 2020
Që çertifikatat fitosanitare dhe ato veterinare të mallit të jenë në përputhje me Kushtetutën dhe legjislacionin në fuqi? ë
Edhe një herë: për çka janë marrë vesh LVV dhe LDK nëse për këtë nuk qenkan marrë vesh.
(Kosova Sot Online)
