Vjosa Osmani paralajmëron padi ndaj kolegëve në LDK: Po shpifin pa marre

  • 07 prill 2020 - 22:07
Vjosa Osmani paralajmëron padi ndaj kolegëve në LDK: Po shpifin pa marre

Kryetarja e Kuvendit të Kosovës, njëherësh nënkryetare e Lidhjes Demokratike të Kosovës, Vjosa Osmani, ka lëshuar një paralajmërim për kolegët e saj partiakë, për të cilët thotë se po shpifin e po e ofendojnë.

Ajo ka paralajmëruar padi ndaj zyrtarëve të LDK’së, duke kërkuar që edhe strukturat e larta të partisë të distancohen nga ato që ajo i ka cilësuar shpifje.

“Ka zyrtarë të lartë të LDK’së që thonë se Vjosa ka bërë thirrje që të mos i besojmë Amerikës. Pa asnjë fije marre… Në mënyrë që të ofendojnë”, ka thënë ajo.

“Mos të flasim për ofendime që bëhen pastaj në baza gjinore”, ka shtuar Osmani.

“Unë sot nuk mund të hesht sepse i kam dy vajza të vogla”, ka thënë nënkryetarja e LDK’së.

“Nuk do t’i duroj asnjërin. Le ta kenë të qartë ata zyrtarë që shpifin e gënjejnë e ofendojnë përtej imagjinatës njerëzore, me gjuhën më të shpifur, do të përfundojnë në hetime”, ka paralajmëruar Osmani, raporton ktv.

“Nuk do të thotë që do të hesht. Përkundrazi. Do të tregojnë pse shpifin për mua. Pres që strukturat e larta të LDK të distancohen ng shpifjet e tilla”, ka thënë ajo.

(Kosova Sot Online)