Berat Rukiqi apel bizneseve: Respektojini masat ose mund të ktheheni në pikën zero

  • 08 qershor 2020 - 11:08
Berat Rukiqi apel bizneseve: Respektojini masat ose mund të ktheheni në pikën zero

Kryetari i Odës Ekonomike të Kosovës, Berat Rukiqi, ka bërë thirrje që bizneset t’i respektojnë masat mbrojtëse për parandalimin e përhapjes së koronavirusit.

Ai përmes një statusi në llogarinë e tij në rrjetin social Facebook, ka thënë që pas shumë përpjekjeve që kemi bërë për të lejuar hapjen graduale të ekonomisë, gjithçka mund të kthehet në pikën zero.

“Kemi bërë shumë përpjekje dhe mund për të lejuar hapjen graduale të ekonomisë, edhe shumë më shpejt se vendet tjera, por gjithçka mund të kthehet në pikën 0, nëse masat për të cilat jemi zotuar që do t’i respektojmë, nuk respektohen, sidomos në bizneset ku ka grumbullime dhe turma”, ka shkruar Rukiqi.

“Bota ka filluar t’i kthehet normalitetit, por ky normalitet tani i ka rregullat e veta. Rregull mbi rregullat është kujdesi për veten dhe të tjerët, duke mbajtur distancën, duke mbajtur maskat (sidomos stafi) dhe duke bërë dezinfektime të rregullta”.

“Mospërhapja e virusit dhe shkuarja drejt përfundimit zyrtar të pandemisë na lejon të fokusohemi në pjesën e masave për rimëkëmbjen e ekonomisë. Sa më shpejt që kemi përfundim zyrtar të pandemisë, aq më e shpejtë do te jetë rimëkëmbja ekonomike”, është shprehur ai.

Ditën e djeshme në Kosovë janë konfirmuar edhe 40 raste të reja me COVID-19, duke e çuar kështu numrin e përgjithshëm të të infektuarve në 1,234.

(Kosova Sot Online)