VV reagon pas lajmit për vazhdimin e dialogut Kosovë-Serbi në Shtëpinë e Bardhë

Lëvizja Vetëvendosje ka reaguar pas u bë e ditur se dialogu Kosovë-Serbi do të vazhdojë në Shtëpinë e Bardhë në Uashington.

I dërguari Special i SHBA’së për dialog, Richard Grenell, ka bërë të ditur se dialogu do të mbahet më 27 qershor, ndërkohë që deri në atë datë Serbia do të heqë dorë nga fushata e cnjohjeve dhe Kosova do të heqë dorë nga antarësimi në organizta ndërkombëtare.

‘’Pas sajimit të qeverisë së paligjshme, deklarata e parë e presidentit Thaçi ishte se duhet të largohen të gjitha pengesat karshi dialogut, dhe ashtu ndodhi: qeveria koti largoi masën e reciprocitetin ndaj Serbisë, duke e zhveshur tërësisht Republikën e Kosovës nga sovraniteti e dinjiteti shtetëror. Ndërkaq sot emisari i presidentit Trump, Richard Grenell, na njoftoi për vendimin e radhës së kësaj qeverie: që të heqë dorë nga përpjekja për anëtarësimin e Kosovës në organizatat ndërkombëtare.’’, thotë VV në një komunikatë.

‘’Qeveria Koti e Hashim Thaçit tashmë është në të njëjtën linjë me përpjekjen e Serbisë, me zotimin e kryeminsistrit Koti dhe Hashim Thaçit, se Kosova nuk është e barabartë me Serbinë dhe se Kosova nuk do të angazhohet për subjektivitet ndërkombëtar. Ky është pozicioni me të cilin këta shkojnë në dialog me Serbinë. Ky vendim erdhi pak orë pas takimit Hoti-Thaçi.’’

‘’Sot më shumë se kurrë kuptohet përpjekja e gjithë këtij Klubi të Stërvjetëruar Politik për ta larguar qeverisjen që filloi të sillet si shtet normal në arenën ndërkombëtare e të forcojë sovranitetin për së brendshmi. Qeveria Kurti i ka penguar pazaret me thika mbi harta që po i kanoseshin Republikës së Kosovës. Për tandemin Thaçi-Vuçiq ishte e nevojshme një qeverisje pa legjitimitet popullor, e diskredituar, marionetë, e cila ndjek aventurën e tyre të nisur tash e disa vite.’’

VV bën të ditur se nuk do të votojë asnjë marrëveshje ndërkombëtare që cënon integritetin territorial. Ata e quajnë ilegale Qeverinë Hoti ndërkohë që kanë bërë të ditur se do të kundërshtojnë këto marrëveshje.

‘’Lëvizja VETËVENDOSJE! thekson se asnjë marrëveshje që cënon integritetin territorial e funksional të Republikës së Kosovës nuk do të mund të implementohet në vendin tonë dhe se nuk mund të ketë dialog nga një qeveri ilegale dhe ilegjitime që është në diskeprancë totale me vullnetin e popullit. Konjukturat e kapura nuk mund të dëmtojnë vullnetin e shumicës. Lojërat me copëtime krijojnë parakushtet për destabilizim të rajonit, e vënë në rrezik një numër të madh njerëzish.’’

(Kosova Sot Online)