Haga publikoi lajmin për aktakuzë ndaj Thaçit tre ditë para takimit të Washingtonit

 Prokuroria Speciale e Hagës ka ngritur sot aktakuzë ndaj presidentit të vendit, Hashim Thaçi, dhe kreut të PDK’së, Kadri Veselit, mbi dyshimet se janë penalisht përgjegjës për rreth 100 vrasje.

Një aktakuzë e tillë për kreun e shtetit, Hashim Thaçin, vjen vetëm 3 ditë para mbajtjes së takimit të 27 qershorit në Washington i iniciuar nga emisari i Trump për dialogun Kosovë-Serbi, Richard Grfenell.

Ky takim në Shtetet e Bashkuara të Amerikës ishte konsideruar i një rëndësie të jashtëzakonshme për të dy vendet, megjithatë nuk dihet tashmë nëse presidenti i vendit do të japë dorëheqje para se të marrë pjesë në këtë takim.

Sipas njoftimit të Zyrës së Prokurorit të Specializuar më 24 prill iu është paraqitur aktakuza Dhomave të Speicalziuara.

“Më 24 prill 2020, Zyra e Prokurorit të Specializuar (ZPS) u paraqiti Dhomave të Specializuara të Kosovës (DHSK) një aktakuzë me dhjetë pika për shqyrtim prej Gjykatës, ku Hashim THAÇI, Kadri VESELI dhe të tjerë akuzohen për një sërë krimesh kundër njerëzimit dhe krimesh lufte ndër të cilat, vrasje e paligjshme, zhdukje e detyruar e personave, përndjekje dhe tortura. Në Aktakuzë pretendohet se Hashim THAÇI, Kadri VESELI dhe të dyshuar të tjerë janë penalisht përgjegjës për afërsisht 100 vrasje të paligjshme. Krimet e paraqitura në Aktakuzë përshijnë qindra viktima të identifikuara shqiptarë, serbë dhe romë të Kosovës dhe kundërshtarë politikë”, thuhet në njofitm.

Nga Specialja thonë se kanë qenë të detyruar që të nxjerrin një njoftim të tillë për aktakuzë, meqë sipas tyre kreu i shtetit dhe kreu i PDK’së kanë bërë përpjekje për pengimin dhe sabotimin e punës së Dhomave të Specializaura.

“Prokurori i Specializuar e gjykon të domosdoshëm nxjerrjen e këtij njoftimi publik për akuzat, për shkak të përpjekjeve të përsëritura të Hashim THAÇIT dhe Kadri VESELIT për pengimin dhe sabotimin e punës së DHSK-së. Besohet se z. THAÇI dhe z. VESELI kanë ndërmarrë në fshehtësi një fushatë për shfuqizimin e ligjit që krijoi Gjykatën dhe ndryshe kanë penguar punën e Gjykatës në orvatje për t’i bishtnuar drejtësisë, Nëpërmjet këtyre veprimeve, z. THAÇI dhe z. VESELI kanë vënë interesat e tyre vetjake mbi viktimat e krimeve të tyre, sundimin e ligjit dhe popullin e Kosovës”, thuhet ndër të tjera në aktakuzë.

(Kosova Sot Online)