Moderna thotë se imuniteti që ofron vaksina e saj zgjat të paktën një vit

  • G.G /
  • 12 January 2021 - 09:30
Moderna thotë se imuniteti që ofron vaksina e saj zgjat të paktën një vit

Kompania farmaceutike amerikane, Moderna, tha të hënën se imuniteti që ofron vaksina e saj kundër koronavirusit zgjat të paktën një vit.

Zyrtarët e kësaj kompanie shfaqën besim se teknologjia mRNA, e cila është përdorur për prodhimin e vaksinës kundër Covid-19, përshtatet mirë për krijimin e një vaksine kundër variantit të ri të koronavirusit, që është përhapur më shumë në Britani.

Kjo kompani tha se pret që të shpërndajë nga 600 milionë deri në 1 miliard doza të vaksinës gjatë këtij viti, ndërsa pret të bëjë shitje prej 11.7 miliardë dollarësh, duke u mbështetur në marrëveshjet e nënshkruara me qeveritë e shteteve.

“Ekipi ndihet shumë rehat me ecurinë që kemi tani. Jemi në rrugë që të shpërndajmë së paku 600 milionë doza”, tha shefi ekzekutiv i kompanisë Moderna, SDtephane Bancel.

Në dhjetor, kompania tha se do të kryejë testime për ta konfirmuar efektin e vaksinës së saj kundër cilitdo variant të virusit, shkruan The Guardian.

Ndryshe, Shtetet e Bashkuara kanë miratuar vaksinën e Moderna-s dhe Pfizer-it kundër koronavirusit. Ky shtet ka më së shumti të vdekur dhe të infektuar me koronavirus në tërë botën dhe ditëve të fundit ka shënuar rekorde shqetësuese të shifrave.

(Kosova Sot Online)