Gjykata Speciale i raporton UNMIK-ut, jo Kosovës

  • A.P /
  • 14 April 2021 - 13:15
Gjykata Speciale i raporton UNMIK-ut, jo Kosovës

Gjykata Speciale nuk ka asnjë detyrim ndaj Kosovës. Ndonëse është krijuar me miratimin e deputetëve të Kuvendit të Kosovës, Specialja nuk i raporton shtetit, por UNMIK-ut e Bashkimit Evropian.

Në raportin e UNMIK-ut të përgatitur për mbledhjen e Këshillit të Sigurimit, i cili u mbajt dje, Gjykata Speciale i raporton Misionit të Administratës së Përkohshme të Kombeve të Bashkuara në Kosovë (UNMIK) për aktivitetet e saj.

Për këtë kanë reaguar edhe dy ish-zëvendësministra të Ministrisë së Punëve të Jashtme, Teuta Sahatqija e Muhamet Brajshori.

“Raporti i UNMIK-ut pat ekstraktin e Gjykatës Speciale, gjykatë kjo e themeluar nga Kuvendi i Kosovës dhe i cili do të duhej të diskutohej aty e jo në Këshillin e Sigurimit. Fatkeqësisht kjo çështje kaloi pa u vërejtë nga ana jonë”, ka shkruar Sahatqija në Facebook.

Ndërsa ish-zëvendësministri Muhamet Brajshori, në Twitter ka shkruar se Kuvendi i Kosovës duhet të adresojë këtë çështje.

“Gjykata Speciale është themeluar nën Kushtetutën e Kosovës dhe jo nga Rezoluta 1244. Kështu, ajo nuk ka vend në raportin e UNMIK-ut. Gjykata Speciale është kundërshtari më brutal i shtetësisë së Kosovës sot”, ka shkruar ai.

Më 3 gusht të vitit 2015, me shumicë votash, deputetët e Kuvendit të Kosovës i kishin votuar ndryshimet kushtetuese që do ta mundësonin themelimin e Dhomave të Specializuara, që njihen si Gjykata Speciale. Pas një seance të gjatë, 82 deputetë kishin votuar pro themelimit të Gjykatës Speciale, pesë kishin qenë kundër, ndërsa një kishte abstenuar.

(Kosova Sot Online)