Vaksinohet Lul Raka, kritikon mjekët që po kanë dyshime në vaksinën antiCovid

Mikrobiologu i njohur kosovar, Lul Raka ka marr vakinën e imunizimit ndaj COVID-19. Raka është vaksinuar në Qendrën Kryesore të Mjekësisë Familjare“Dëshmorët e Lirisë” në Kaçanik.

Ai ka thënë se nuk ishte nga të parët që u vaksinua në Kosovë sepse nuk donte që të merrte vaksinën para atyre që janë më të rrezikuar se sa ai nga COVID-19, derisa ka kritikuar punëtorët shëndetësorë që po hezitojnë ta marrin atë.

Raka ka thënë se kjo vaksinë është e sigurt dhe se 21 ditë pas marrjes së dozës së parë, pacienti është i mbrojtur nga hospitalizimi dhe vdekja.

Lexoni edhe:

Babai vret me armë gjahu djalin e tij

“Unë ende nuk i kam as 5 muaj nga shërimi prej Covidit dhe në kohën kur Kosova ka numër simbolik vaksinash nuk kam dashur ta marr vaksinën para atyre që janë më të rrezikuarit dhe kanë nevojë më së shumti për vaksinë: të moshuarit dhe ata me sëmundje kronike. Vaksinën e ka marrë edhe gjyshja ime 89 vjeçare, e për ta marrë vaksinën po pret në rend edhe axha im si pensionist e punëtorët shëndetësorë 75 vjeç edhe djali im 19 vjeç me probleme kronike shëndetësore”, ka thënë ai.

Ai është shprehur se po vaksinohet për të dërguar mesazh te ata punëtorë shëndetësorë që po ngurojnë ta marrin vaksinën.

“Për të dërguar mesazh tek ata punëtorë shëndetësorë që po ngurrojnë të vaksinohen. Kohëve të fundit kemi parë se në spitalet rajonale në Gjilan, Prizren e Pejë, por edhe në të gjitha institucionet shëndetësore ka punëtorë që kanë dyshime për vaksinim. Nëse ata dyshojnë në vaksinim, atëherë, ndoshta do të duhej ta heqin mantilin e bardhë dhe të kërkojnë ndonjë punë tjetër për të mbajtur familjem”, ka theksuar ai.

Ai ka treguar edhe pse po ngurojnë mjekët për ta marrë vaksinën.

“Disa kanë thënë se po frikohen nga efektet anësore të vaksinës, me theks të veçantë në mpiksjen e gjakut nga vaksina Astra-Zeneka. Efekte anësore ka çdo vaksinë. Por ethet apo dhembja kalimtare sot është shumë më e lehtë sesa gypi i respiratorit në kujdesin intensive në spitalin Covid nesër. Nëse e krahasojmë rrezikun e mpiksjes së gjakut, e shohim se deri sot janë regjistruar 4 raste mpiksjesh në 1 milionë të vaksinuar. Por në anën tjetër ky rrezik te përdorimi i pilulave kontraceptive është deri 1200 raste në 1 milionë gra; apo 1763 raste në 1 milionë duhanxhinj dhe së fundmi 165.000 raste të mpiksjes ndodhin në 1 milionë pacientë të cilët janë të sëmurë me Covid. Vaksina Astra-zeneka, 21 ditë pas marrjes së dozës së parë, mbron 100% nga vdekja dhe hospitalizimi”, ka shtuar ai për Indeksonline.

Ai ka thënë se deri sot janë vaksinuar miliona njerëz në botë me këtë vaksinë, përfshirë edhe liderë si Angela Merkel e Albin Kurti dhe prijësit e vijës së parë të luftës kundër Covidit në vend në krye me Salih Ahmetin.

Andaj është shprehur se nuk e dinë se çka po presin punëtorët shëndetësorë.

“Kur jemi te efektet anësore dhe rreziqet kemi plot shembuj tjerë në jetën e përditshme, duke filluar prej duhanit. Të gjithë e dijmë se duhani vret. Ky mesazh shkruan në çdo paketë të cigareve. Duhani vret 6 milionë njerëz në botë brenda një viti, por ju vazhdoni me pasion ta pini duke rrezikuar veten dhe fëmijët e vegjël që rrijnë në një dhomë me Ju. Pijet e sheqerosura që shkaktojnë diabet, sëmundje kardiovaskulare e obezitet (si psh. Coca-cola) shkaktojnë 184.000 vdekje në vit në mbarë botën- mija herë më shumë sesa vaksina! Tjetër, rreziku për të vdekur nga rrëzimi i aeroplanit është më i madh sesa vdekja nga vaksina, por ju vazhdoni të hipni në aeroplan. Rreziku për të humbur jetën në trafik komunikacioni është edhe më i madh, por Ju vazhdoni të udhëtoni me veturë e autobus. Një arsyetim tjetër i mjekëve tanë ka qenë pritja për vaksina tjera “më të mira”. Por, mund të ndodh që do ta humbni rendin dhe do të duhej të prisni deri sa të vaksinohen të gjitha kategoritë me dozën e parë”, ka shtuar ai.

Raka në fund ka pasur një mesazh për të gjithë.

“Deri sot kemi mbi 2000 jetë njerëzish të humbura në vend, mijëra tjerë që kanë kaluar katrahurën e sëmundjes me 100 sfida. Askush nuk e di në cilën derë do të trokasë vdekja nesër e pasnesër. Fatkeqësisht, shumë njerëz në Kosovë po mendojnë se e drejta për makiato apo kanagjegj është më e madhe sesa e drejta për jetë. Varianti i ri po bartet shumë shpejt duke prekur edhe moshat e reja. Prandaj individi e ka fatin e kësaj përballje në dorë. Zbatoni masat sepse vetëm kështu mbroni familjen Tuaj! Kurse, spektri politik duhet ta kuptojë që ne e kemi vetëm një armik të përbashkët- Covidin, e jo njëri tjetrin”, ka shtuar ai.

(Kosova Sot Online)