Deputetët kritikojnë qeverinë, po mungojnë punëtorët e kualifikuar, shkollimi s’po i përmbushë nevojat e tregut

  • E.K /
  • 30 qershor 2021 - 12:08
 Deputetët kritikojnë qeverinë, po mungojnë punëtorët e kualifikuar, shkollimi s’po i përmbushë nevojat e tregut

Deputetët e Kuvendit të Kosovës kanë bërë sot shqyrtimin e Rekomandimeve të Komisionit për Mbikëqyrjen e Financave Publike lidhur me Raportin e Auditimit të performancës“Efektiviteti i ndërlidhjes së arsimit dhe aftësimit profesional me nevojat e tregut të punës”.

Me këtë rast është thënë se në Kosovë mungon një analizë e drejtimeve profesionale dhe se mungojnë punëtorët e kualifikuar, për shkak se të shkolluarit nuk po i përmbushin nevojat e tregut.

Deputeti i Vetëvendosjes, Eman Rrahmani ka deklaruar se një numër i profileve në Kosovë nuk janë shikuar që nga viti 2013.

Ai ka thënë se ka mungesë të një analize të drejtimeve profesionale.

Kurse kryetari i Komisionit për Arsim, Ardian Gola tha se akoma në Kosovë ka një stigmatizim të shkollave profesionale e mungesë të hapësirave nga bizneset për punë praktike të nxënësve.

Ndërsa, Eliza Hoxha nga PDK-ja ka thënë se është shpresëdhënëse që pas tranzicionit në Kosovë vëmendje e veçantë u kushtohet nevojave të arsimit.

 “Sot më shumë se kurrë është i domosdoshëm ndërtimi i sistemit arsimor gjithëpërfshirës. Të zgjerohet bashkëpunimi ndërinstitucional, të orientohen nxënësit në drejtimet që ndikojnë në zhvillimin ekonomik të vendit. Të ketë më shumë buxhet e fokus për stimulimin e nxënësve për shkollim në shkolla profesionale” është shprehur ajo.

Ajo i ka dhënë kritikë Qeverisë që nuk e ka trajtuar arsimin mjaftueshëm në programin e saj.

Ndërsa deputetja e AAK-së, Albena Reshitaj tha se në Kosovë shkalla e papunësisë është e lartë derisa edhe numri i punëkërkuesve të diplomuar është tregues më i mirë i gjendjes së arsimit.

(Kosova Sot Online)