Sanduloviq: Gjeneratat e reja në Serbi nuk e dinë të vërtetën për Kosovën dhe krimet serbe atje

Kryetari i Partisë Republikane Serbe, Nikolla Sanduloviq, është arrestuar nga Agjencia e Inteligjencës e Serbisë (BIA), dje rreth orës 16:00, ka bërë të ditur avokati i tij. Lajmin e ka bërë të ditur avokati Çedomir Stojkoviq një postimi në X.

Vetëm pak kohe pas postimit të tij në rrjetin X ku shpreh ngushëllimet e tij për shqiptarët në Kosovë për eliminimin e 50 anëtarëve të familjes Jashari në vitin 1998, dhe vetëm 1 minutë pasi media e regjimit filloi një fushatë të orkestruar urrejtjeje kundër tij për shkak të atij postimi – fjali të thjeshta që shprehin ngushëllime.

Sipas tij, ky është një tregues i qartë i politikës së Aleksandër Vuçiqit ndaj Kosovës dhe një tregues i qartë i synimeve të tij në Kosovë.

“Kushdo nga Serbia që bashkëpunon me Kosovën ose ballafaqohet me të kaluarën, do të jetë në shënjestër të autoriteteve, mediave dhe gjithçkaje që shkon me të. Nikolla Sanduloviq është dërguar sot në një vend të panjohur, si policia ashtu edhe BIA nuk kanë pranuar t’i tregojnë gruas së Nikollës se ku ndodhet dhe familja e tij tani po kalon momente të vështira. Ata gjithashtu refuzojnë t’ua japin këtë informacion avokatëve të tij.Ftoj opinionin publik që ta ndjekë këtë rast, veçanërisht mediat rajonale dhe ndërkombëtare. Parimi dhe shteti ligjor duhet të jenë më të rëndësishëm se çdo shije!, shkruan Stojkoviq.

Cka tha ai për Kosovën?

Kryetari i Partisë Republikane të Serbisë, Nikola Sanduloviq, ka deklaruar se gjeneratat e reja në Serbi po manipulohen nga partia ne pushtet e Aleksandar Vuçiqit dhe prandaj dinë shumë pak për krimet që janë kryer ne Kosovë nga shteti serb. Ai mes tjerash, shprehet skeptik për të ardhmen e procesit të dialogut mes Kosovës dhe Serbisë, deri sa në krye të shtetit serb është Aleksandar Vuçiq.

Është nga të rrallët politikanë serbë që ka kërkuar falje publikisht për krimet që ka kryer Serbia në Kosovë gjatë vitit 1998-1999.

Ai madje ka bërë edhe homazhe në Prekaz për të nderuar familjen Jashari.

Ish-kandidati për kryetar të Serbisë, Nikola Sanduloviq e ka krahasuar regjimin e Aleksandar Vuçiqit me atë të Millosheviqit. Tutje ai e sheh si shqetësuese që gjenerata e reja në Serbi dinë shumë pak se çfarë ka ndodhur në të kaluarën dhe për krimet që janë kryer në Kosovë.

“Gjeneratat e rejat nuk e dinë të vërtetën për krimet që kanë bërë serbët, dhe ndryshimet të cilat njëmend kanë dëshiruar t’i bënin demokratët. Ata merren me politikën, analizojnë gjërat, por janë të hutuar, të filtruar, çdo ditë me anë të medieve, dhe u mësohet të urrejnë shqiptarët, e as vetë nuk e dinë arsyen për këtë”, ka thënë ai për Tëvë 1.

Sanduloviq, thotë se presidenti aktual i Serbisë ushtron kontroll të plotë mbi shtetin.

“Ai ka okupuar të gjitha institucionet, lidhjet me krimin, gjykatën, policinë, me politikanët që ka blerë, opozitën e korruptuar, dhe fatkeqësisht, nuk e di si do t’ia dalë Evropa ta largojë Vuçiqin nga pushteti para vitit 2027”, thotë ai.

Politikani serb ka folur edhe për çështjen e dialogut mes të dyja vendeve, ku thotë se Vuçiq asnjëherë nuk do ta njoh pavarësinë e Kosovës.

“Mendoj se Vuçiq vetëm ka blerë kohë me këto lëshimet e fundit, që shqiptarët mund të udhëtojnë nga Kosova me tabelat e tyre, dhe dokumentet që Evropa i njeh, por në themel mendoj që nuk do të ndryshojë asgjë, problemet vetëm sa do të fillojnë tash që Vuçiq është në fazën e katërt të pushtetit. Ai kurrë nuk do të pranojë pavarësinë e Kosovës dhe anëtarësimin e saj në institucionet ndërkombëtare. Nuk mendoj se diçka do të ndryshojë këtë vit, përkundrazi, mendoj se do të ketë shumë më tepër gjëra të komplikuara, siç ishte sulmi terrorist në Banjskë, një akt që ka qenë nën kontrollin e sigurt të qeverisjes serbe”, thotë Sanduloviq.

Sanduloviq ka kritikuar edhe një pjesë të komuniteti ndërkombëtar, që siç thotë ai po e mbështesin Vuçiqin.

“Problemi kryesor padyshim është që Vuçiq ka përkrahjen, ka përkrahjen e disa strukturave në Evropë, si dhe, fatkeqësisht, e them me shumë pikëllim, përkrahjen e strukturave të caktuara në Amerikë, e që udhëhiqen nga Richard Grenell, dhe politikanë tjerë të korruptuar në qeverisjen e SHBA-ve. Nuk di pse askush nuk i merrte parasysh paralajmërimet e mia,pse u lejua të vinim në këtë situatë. Me këtë rast do të doja t’i përcjellja porosinë, edhe politikanëve evropian, edhe amerikan, pse heshtin? Pse i mbyllin sytë ndaj mundësisë për zgjidhjen e problemit, që të ketë paqe, qetësi, që ky regjion të ecën përpara, e jo të mbetemi në hijen e luftërave që na kanë ndodhur”, thotë politikani serb.

Kryetari i Partisë Republikane të Serbisë, Nikola Sanduloviq, ishte në Kosovë gjatë 15 vjetorit të pavarësisë, ku bëri homazhe tek varrezat e Jasharajve së bashku me krerët shtetëror të Kosovës.

(Kosova Sot Online)