Përjashtohet nga puna zyrtari i MINT për Rezerva Shtetërore

Zyrtari për cilësinë e naftës dhe produkteve të naftës në Departamentin për Rezervat Shtetërore në Ministrinë e Industrisë, Ndërmarrësisë dhe Tregtisë, Ermal Kutllovci, është larguar nga puna me vendim të Komisionit Disiplinor, përcjell “Kosova Sot Online”.

Në vendimin e Komisionit, thuhet se Kutllovci ka bërë sjellje jo të mirë, gjuhë nënçmuese dhe aspak profesionale para Ministres Rozeta Hajdari dhe menaxhmentit të lartë të Ministrisë.

“Sot me datën, 29 Janar 2024, pranova Vendimin me Nr. Protokolli 454/02, përmes se cilit u njoftova se masa e ndëshkimit disiplinor ndaj meje u bë për shkak të ngritjes së zërit kritik brenda Institucionit, krejtësisht në mbrojtje të ligjshmërisë me epilog "LARGIM NGA MARRËDHËNIA E PUNËS". Çdo reagim e kundërshtim i imi brenda institucionit ishte i bazuar në Ligjin për Zyrtarët Publikë dhe Ligjin për Sinjalizimin, shkruan Kutllovci.

“Sa ka qenë i pranishëm në takimin në zyrën e Departamentit të Rezervave Shtetërore të Mallrave të vizituar nga Kabineti i Ministres me zv.Sekretarin e Përgjithshëm, i cili ka kërkuar të diskutojë për çështje të brendshme profesionale që kanë të bëjnë me Departamentin e Rezervave Shtetërore. Gjithashtu e ka potencuar se nuk ka pranuar të nënshkruaj formularin e AKI’së dhe Deklaratën e Konfidencialitetit si dhe ka refuzuar të marr pjesë në komisionin e themeluar me Vendim nga zv.Sekretari i Përgjithshëm i MINT lidhur me rezervat shtetërore”, thuhet në vendim.

(Kosova Sot Online)