Zbulohet se çfarë po planifikonin banditët e Vuçiçit
Grupit të shtetasish serbë, të cilëve para pak ditësh iu ndalua hyrja në Mal të Zi, dyshohet se po planifikonin organizimin e një serie tubimesh mbështetëse për presidentin e Serbisë, Aleksandar Vuciq, gjatë qëndrimit të tij në Tivat.
Qëllimi ishte të krijohej përshtypja se Vuçiçi gëzon mbështetje të fortë edhe nga qytetarët e Malit të Zi.
Ndërsa policia malazeze njoftoi se tek udhëtarët u gjetën pankarta me mbishkrimin “Serbia fiton”, pajisje komunikimi dhe se në aeroport i prisnin dy autobusë, burime të këtij portali pretendojnë se plani ishte shumë më i gjerë.
Sipas disa burimeve të njohura me organizimin e ardhjes së grupit, personat që mbërritën me fluturim çarter nga Beogradi duhej të organizonin disa grumbullime “spontane” mbështetjeje për Vuçiçin gjatë samitit.
Plani përfshinte paraqitjen në lokacione të ndryshme në Tivat dhe zonat përreth, shpalosjen e pankartave, si dhe organizimin e ndezjes së flakadanëve dhe tubimeve publike. Në këtë mënyrë synohej të krijohej përshtypja se qytetarët e Malit të Zi po i ofronin spontanisht mbështetje presidentit serb.
Sipas burimeve të Nova.rs, qëllimi nuk ishte vetëm dërgimi i një mesazhi për opinionin publik në Serbi, por edhe paraqitja e Vuçiçit si një lider që gëzon mbështetje përtej kufijve të vendit të tij, para zyrtarëve ndërkombëtarë të pranishëm në samitin BE – Ballkani Perëndimor.
Model i njohur veprimi
Sipas informacioneve të siguruara nga portali, një model i ngjashëm është përdorur edhe më herët në disa qytete të rajonit, përfshirë Macedoninë e Veriut.
Gjatë vizitave të mëparshme janë organizuar aktivitete me qëllim krijimin e imazhit të një mbështetjeje të gjerë rajonale për pushtetin në Beograd.
Burimet theksojnë se nuk është rastësi që grupi prej 87 personash mbërriti në Tivat dy ditë para samitit ku ishte planifikuar pjesëmarrja e presidentit serb.
Kujtojmë se grupi prej 87 burrash, i cili mbërriti një ditë më parë në Mal të Zi me një fluturim çarter, u kthye në Beograd me vendim të shërbimeve të sigurisë malazeze.
Sipas mediave dhe aktivistëve nga Serbia, në mesin e tyre kishte persona të lidhur me incidente të dhunshme në protesta dhe me Serbian Progressive Party (SNS).
Ngjarja ndodhi në prag të samitit më të madh ndërkombëtar në historinë e Malit të Zi dhe ka ngritur pyetje nëse bëhet fjalë për një dështim sigurie, një mesazh për mysafirët evropianë apo një përpjekje për të larguar vëmendjen nga aferat në Serbi.
Në Tivat mbahet samiti i Bashkimit Evropian dhe Ballkanit Perëndimor, ku marrin pjesë liderë të lartë rajonalë dhe evropianë, përfshirë Emmanuel Macron, Friedrich Merz, Giorgia Meloni, Pedro Sánchez, António Costa dhe Ursula von der Leyen.
Sipas gazetës Vijesti, katër shtetas serbë kishin mbërritur në Mal të Zi që më 2 qershor për të siguruar akomodim në hotele luksoze në Tivat për grupin që më pas u dëbua.
Grupi prej 87 personash zbriti në Tivat me një fluturim çarter të kompanisë Air Serbia, i kontraktuar nga agjencia turistike Happy Travel nga Bijeljina, dhe u kthye në Beograd pas rreth pesë orësh.
Shërbimet malazeze të sigurisë deklaruan se grupit iu ndalua hyrja sepse përbënte kërcënim për sigurinë kombëtare.
Sipas autoriteteve, anëtarët e grupit kishin marrë pjesë në disa tubime publike me rrezik të lartë sigurie, ndërsa disa prej tyre ishin evidentuar për vepra penale dhe kundërvajtje me elemente dhune.
Në pyetjet e policisë për arsyen e ardhjes në Mal të Zi, pjesëtarët e grupit nuk pranuan të përgjigjeshin.
Shumë nga personat që u kthyen në Serbi përshkruhen nga media, politikanë opozitarë dhe aktivistë si “batinashë” të SNS-së dhe të regjimit të Vuçiçit.
Ata lidhen me shpërndarjen e protestave studentore, nxitjen e incidenteve në ngjarje sportive dhe aktivitete të tjera të ngjashme në Serbi.
Reagimet dhe masat e sigurisë
Policia dhe Agjencia Kombëtare e Sigurisë e Malit të Zi konfiskuan pankarta me slogane të SNS-së si “Srbia fiton”, pajisje komunikimi në distancë dhe një radio-stacion detar.
Gjithashtu u sekuestruan dy autobusë me targa serbe, për të cilët dyshohet se do të përdoreshin për transportimin e grupit.
Një burim policor deklaroi për Vijesti se fluturimi nga Beogradi ishte vënë nën kontroll për shkak të dyshimeve për “veprimtari hibride”.
Kryeministri i Malit të Zi, Milojko Spajiq, kishte paralajmëruar më herët se vendi është objekt i aktiviteteve dashakeqe që synojnë të pengojnë rrugën evropiane të shtetit.
Kush janë personat e dëbuar?
Në mesin e personave të kthyer në Beograd ndodhen individë me të kaluar kriminale, të cilët mediat serbe prej vitesh i lidhin me aktivitete në shërbim të strukturave të pushtetit dhe SNS-së.
Mes tyre përmenden Dalibor Stanojeviq Boske, Aleksandar Jankoviq i njohur si Aca Hari, Nemanja Naraçi, Stefan Kojoviq, si dhe disa persona të tjerë që organizata studentore dhe opozita serbe i akuzojnë për sulme ndaj protestuesve dhe qytetarëve në tubime të ndryshme në Serbi.
(Kosova Sot Online)
