Fakte interesante për Babadimrin
1. BABADIMRI KA EKZISTUAR DIKUR!
Folklori mund ta ketë shndërruar Babadimrin në një burrë të vjetër që shpërndanë
dhurata, duke u shëtitur me një sajë që tërhiqet nga tetë drerë që fluturojnë,
megjithatë, kjo figurë është e bazuar në një person të vërtetë. I lindur në vitin 270,
Shën Nikolasi ka qenë peshkop i Mirës, një vend që shtrihej në Turqinë e sotme. Ai
ishte bërë i famshëm për shkak të dhuratave të fshehta që ua bënte fëmijëve të varfër,
duke ua lënë dhuratat në këpucë e në dritare, për t'i befasuar në mëngjes.
2. TERMI BABADIMËR PËRDORET NGA VITI 1773
Holandezët e kanë mbajtur të gjallë tregimin për Shën Nikolasin, duke treguar se si
peshkopi shkonte dhe i befasonte fëmijët me çokollata e dhurata tjera në natën e 5
dhjetorit. Megjithatë, hera e parë kur është përdorur emri Babadimër ka qenë viti
1773, term ky që ishte përdorur në një gazetë të qytetit të Nju-Jorkut.
3. KA QENË SATIRA AJO QË E KA FUTUR BABADIMRIN NË OXHAK PËR HERË TË
PARË
Në librin satirik të vitit 1809, "A History of New York", Washington Irving e kishte
paraqitur Babadimrin si një peshkop hollak. Në librin e tij Babadimri është paraqitur
si një person që tymos duhan dhe pikërisht në këtë libër është përmendur për herë të
parë futja e Babadimrit në oxhakun e një shtëpie, për t'u shndërruar më pastaj në
traditë.
4. "TWAS THE NIGHT BEFORE CHRISTMAS" KA TREGUAR PËR DRERËT VERIORË
Poema "A Visit From Saint Nicholas" e Clement Moore-t, që më vonë është bërë e
njohur si "Twas the Night Before Christmas", ka qenë e para që ka prezantuar drerët
veriorë para botës. Poema ishte publikuar më 23 dhjetor të vitit 1823 dhe, në mesin e
shumë detajeve të reja për Babadimrin, ishte treguar që ai shëtitet me një sajë, që
tërhiqet nga tetë drerë veriorë.
5. 'COCA-COLA' E KA KRIJUAR BABADIMRIN MODERN
Kur Gjyshi i Festave të Fundvitit kishte filluar të paraqitej për herë të parë në
ilustrime ai kishte rroba me ngjyra të ndryshme: të gjelbra, të kaltra, rozë dhe shumë
ngjyra të tjera. Ndërsa, versioni i Babadimrit, që është gjallë edhe sot, ai me kostumin
me ngjyrë të kuqe dhe të bardhë, për herë të parë është krijuar në vitin 1931 nga artisti
Haddon Sundblom, i cili e kishte punuar për një kampanjë të 'Coca-Cola'-s.
6. BABADIMRI I PARË NË NJË QENDËR TREGTARE ËSHTË VENDOSUR PARA 120
VJETËSH
Në vitin 1890, biznesmeni nga Masaçusetsi i Shteteve të Bashkuara të Amerikës ishte
bërë Babadimri i parë në Qendër Tregtare, sipas "The Smoking Jacket". Edgar kishte
ardhur me idenë e veshjes si Babadimër për qëllime marketingu. Fëmijët nga vende të
ndryshme kishin shkuar për ta vizituar Babadimrin e Vitit të Ri në këtë Qendër
Tregtare, gjë që më pastaj ishte shndërruar në traditë.
7. BABADIMRI KA QENË BEQAR DERI NË VITIN 1849
Për herë të parë bashkëshortja e Babadimrit është përmendur në tregimin e shkurtër
"A Christmas Legend" të shkruar nga James Rees në vitin 1849. E, në vitet në vijim,
ideja e ekzistencës së zonjës së Babadimrit kishte gjetur vend në një sërë veprash
tjera, të ndërlidhura me Babagjyshin e Festave të Fundvitit.
(Kosova Sot)