Mos e votoni Demarkacionin - Opinione - Kosova Sot
Mos e votoni Demarkacionin

Mos e votoni Demarkacionin

Marrëveshja fatkeqe për vendin

Nëse votohet Demarkacioni me Malin e Zi sipas variantit të Qeverisë së kaluar, atëherë do të ndryshojë edhe pamja e flamurit shtetëror, për shkak të ndryshimit të kufijve, gjegjësisht për shkak të humbjes së rreth 12 mijë hektarëve tokë të Kosovës

SHKRUAN: FLORIM ZEQA 

V ënia e kushteve të padrejta pushtetarëve kosovarë në këmbim të liberalizimit të vizave, siç është Demarkacioni me Malin e Zi, është akt i paprecedent nga zyrtarët e BE-së! Pasi një gjë të tillë nuk e kanë aplikuar edhe për vendet e tjera të rajonit, gjegjësisht me republikat e tjera të ish- Federatës jugosllave, disa prej të cilave janë bërë edhe pjesë e BE-së dhe NATO-s pa u vënë kushtin e demarkimit të kufirit, siç është rasti pikërisht me Malin e Zi, me të cilin vend Kosova ndodhet në kontekst territorial, por që qytetarët e këtij vendi nuk e bartin asnjë konsekuencë sa i përket lëvizjes së lirë të njerëzve dhe mallrave drejt vendeve të BE-së. Kështu, të vetmit që padrejtësisht po penalizohen në Ballkanin Jugperëndimorë janë shqiptarët. A thua pse!? Sepse e gjithë kjo është pasojë e një lidershipi të papërgjegjshëm kosovar në këtë dekadën e fundit, gjegjësisht në dekadën e pavarësimit dhe njohjes ndërkombëtare të shtetit tonë. Mbetet krejtësisht i pajustifikueshëm fakti, se për çfarë motivesh kryeministri aktual Ramush Haradinaj mohon të gjeturat e komisionit nën udhëheqjen e Prof. Shpejtim Bulliqit, të cilin vetë e caktoi që në ditën e parë të ngritjes në fronin qeveritar, dhe për ironi të faktit tani pranon ratifikimin e një marrëveshje, të cilën si opozitar e kishte kundërshtuar me të gjitha mjetet ligjore dhe antiligjore si në Kuvend, ashtu edhe në komisionin për demarkimin e kufirit,...me ç'rast, përveç hedhjes në fytyrë të hartave, e kishte ofenduar rënd në baza seksiste ish- kryetarin e komisionit qeveritar Murat Meha.

Mos u bëni pjesë e politikave shkatërrimtare të shtetit

Tani me të drejtë shtrohet pyetja hipotetike; "A meriton mirënjohje Murat Meha nga liderët shtetërorë apo ndëshkim Prof. Shpejtim Bulliqi" që bëri publike të gjitha shkeljet e komisionit paraprak!? Një gjë është e sigurt, presidentit Hashim Thaçi i kanë mbetur shumë dekorata në zyrën e tij, e ndoshta kryeministri do të përkujdeset për mirënjohjet! Demarkacioni nuk është kushti themeltar për liberalizim të vizave siç po trumbetojnë liderët tonë shtetërorë, kjo është farsë, është truk politik për gllabërimin e tokave nga trungu ynë kombëtar! Farsë dhe hipokrizi politike është kushti i Demarkacionit në këmbim të liberalizimit të vizave. Ngase pengesa kryesore e mosliberalizimit të vizave është klasa e korruptuar dhe servile politike e Kosovës, e cila djallëzisht është duke u përdorur nga Beogradi, Podgorica, Shkupi dhe Brukseli për gllabërimin e serishëm të tokave tona stërgjyshore. Nëse votohet Demarkacioni me Malin e Zi sipas variantit të Qeverisë së kaluar, atëherë do të ndryshojë edhe pamja e flamurit shtetëror, për shkak të ndryshimit të kufijve, gjegjësisht për shkak të humbjes së rreth 12 mijë hektarëve tokë të Kosovës, e cila e cenon në mënyrë drastike territorin e vendit tonë, gjë e cila e ndryshon edhe në aspektin gjeografik hartën e Kosovës, si dhe do t'i vënë në lajthitje shtetet që e kanë e njohur pavarësinë e vendit tonë në kufijtë ekzistues të saj. Deputetët e kanë obligim kushtetues të dalin fuqishëm në mbrojtje të kushtetutshmërisë dhe sovranitetit të shtetit. Të mos e votojnë ratifikimin e marrëveshjeve fatkeqe të liderëve të shantazhuar politikë. Ju deputetë shqiptarë të Kuvendit të Republikës së Kosovës, pa dallime partiake, pozitë dhe opozitë vihuni në shërbim të mbrojtjes së interesave të shtetit, atdheut tuaj dhe qytetarëve të vendit. Mos u bëni pjesë e politikave shkatërrimtare të shtetit për të cilin u derdh shumë gjak, u bënë sakrifica të panumërta të brezave të tërë.

Bëhuni mbrojtës të sovranitetit të shtetit

Deputetë shqiptarë të Kuvendit të Republikës së Kosovës, që në damarët tuaj rrjedh gjak shqiptari, mos lejoni të shkelet mbi amanetin e shumë brezave, mbi gjakun e dhjetëra mijëra dëshmorëve dhe martirëve të lirisë tonë. Deputetë shqiptarë të Kuvendit të Republikës së Kosovës, me votimin kundër Demarkacionit jo vetëm që mbroni amanetin e dëshmorëve, mbroni copëtimin e trojeve etnike shqiptare, mbroni Republikën e Kosovës, mbroni ardhmërinë e bashkatdhetarëve tuaj në shtetin e Kosovës. Andaj, bëhuni mbrojtës të sovranitetit të shtetit, bëhuni ndërtues të paqes dhe sigurisë afatgjate në këtë pjesë të gadishullit ballkanik. Në të kundërtën, ju deputetë shqiptarë të Kuvendit të Republikës së Kosovës, me votën "pro" marrëveshjeve fatkeqe për vendin, me (pa) dashjen tuaj do të shndërroheni në shkaktarë të trazirave dhe gjakderdhjeve të shpejta në trojet dardane, ngase populli nuk do të pranojë për asnjë çmim humbjen e tokave të veta, kthimin prapa të trashëgimisë stërgjyshore nën kthetrat e pushtuesve sllavë. Deputetë, mos lejoni të bjerë mbi ju mallkimi i një popullate të tërë!Andaj, që kjo të mos ndodhë, mos e votoni Demarkacionin! Të gjithë në mbrojtje të integritetit territorial të vendit! Edhe ju veteranë të vërtetë të lirisë së atdheut, nëse sot heshtni, pendimi dhe reagimi juaj nesër mbetët i pavlerë! Këtë shkrim dëshiroj ta përfundoj me një thënie të Paulo Coelhos: "Të presësh është e dhimbshme, edhe të harrosh është e dhimbshme, por të mos dish se çfarë vendimesh të marrësh, kjo është një nga vuajtjet më të mëdha".

(Kosova Sot)

 

22 orë e 22 minuta më parë
13/12/18