Lamtumirë heroinë e Kosovës, Fitnete Ramosaj!

Lamtumirë heroinë e Kosovës, Fitnete Ramosaj!
Lamtumirë heroinë e Kosovës, Fitnete Ramosaj!

Prof. Dr. Mehdi Hyseni

  • 09 April 2019 - 08:28

Fitnete Ramosaj nuk pushoi së vepruari në shërbim të lirisë dhe të pavarësisë së Kosovës

I lehtë i qoftë dheu i Kosovës për të cilën nuk kurseu asgjë, ashtu sikurse Shotë Galica dhe Xhevë Lladrofci, që së bashku jetën ia falën lirisë së Kosovës. Pa dyshim se këto janë faqja më e ndritshme e historisë dhe e krenarisë së kombit dhe e atdheut shqiptar

Luftëtarja e UÇK-së nga Deçani, Fitnete Ramosaj me ndërgjegjen më të lartë, me trimëri dhe me heroizëm e valëviti flamurin e UÇK-së për lirinë dhe për pavarësinë e Kosovës. Vdekja e saj e hershme (5 prill 2019) na befasoi dhe na pikëlloi të gjithëve anembanë Shqipërisë Etnike.

I lehtë i qoftë dheu i Kosovës për të cilën nuk kurseu asgjë, ashtu sikurse Shotë Galica dhe Xhevë Lladrofci, që së bashku jetën ia falën lirisë së Kosovës. Pa dyshim se këto janë faqja më e ndritshme e historisë dhe e krenarisë së kombit dhe e atdheut shqiptar. Me emrin dhe me veprën e tyre heroike liridashëse, mburremi ne sot, si dhe të gjithë brezat e nesërm shqiptarë të Shqipërisë Etnike.

Vajtimi postmortem i vlerave është hipokrizi dhe djallëzi sui generis

Reagimin e prekshëm, të dhembshëm mbresëlënës dhe shumë domethënës të deputetit tonë të nderuar dhe të çmuar Milaim Zeka për vdekjen e Fitnete Ramosajt po e citoj në origjinal, pa asnjë ndërhyrje: “Kur ikin njerëzit në atë botën tjetër, të gjithë flasim fjalë të mira. Ndoshta jemi i vetmi popull që vetëm xhenazet i nderojmë dhe i respektojmë. Sa ishte e gjalle Fitnetja, pak kush nga ne e kemi dashtë, nderu dhe respektu. Fitnetja ka qenë sinonim i femrës të mirë shqiptare. Ajo ka qenë yrnek i Xheve Krasniqit Lladrovci. Po asnjë post nuk i dhamë. Nejse... Fitnete Ramosaj do mbetet tregimi më i mirë për katër vajzat e mia.

Si të mos ia pranoj për së gjalli këtë të vërtetë të pohuar të Milaim Zekës, i cili gjithmonë e ka folur dhe e ka shkruar të vërtetën për ngjarjet dhe për fenomenet e caktuara të shoqërisë shqiptare, jo vetëm për Kosovën para, gjatë dhe pasluftës (1989-2019). Ndaj, nuk heshti as me rastin e dhembshëm të vdekjes së hershme të luftëtares së dalluar të UÇK-së, Fitnete Ramosaj, më 5 prill 2019, duke pohuar një të vërtetë të madhe se ne “vetëm kufomat i nderojmë dhe i respektojnë pas vdekjes së tyre”.

Kjo e vërtetë është e pakundërshtueshme (hiq pa “ndoshta” siç është shprehur M.Zeka). Kjo është fatkeqësi njerëzore dhe kombëtare, por është më se e vërtetë se ne vlerat i “vajtojmë” vetëm pas shuarjes së tyre, duke mos ua njohur meritat, duke mos i respektuar dhe duke mos i nderuar derisa janë të gjallë në këtë botë. Mirëpo, kjo “formë vajtimi” post-mortem është hipokrizia më e rafinuar ndaj njerëzve të merituar-vlerave tona njerëzore, humane, kombëtare, patriotike dhe atdhetare shqiptare. Me një fjalë ky është grafiku më i lartë i barometrit të fshehjes dhe të justifikimit të hipokrizisë, të djallëzisë, të egocentrizmit, të padrejtësisë dhe të antihumanizmit.

Fitnetja ishte VLERË e margjinalizuar si shumë vlera të tjera në kohë paqeje (2000-2019) !

Këtë konstatim tonin e provon katërçipërisht edhe ky vlerësim i ekuilibruar i deputetit Milaim Zeka, kur thotë se “Sa ishte e gjallë Fitnetja, pak kush nga ne e kemi dashtë, nderu dhe respektu. Fitnetja ka qenë sinonim i femrës të mirë shqiptare. Ajo ka qenë yrnek i Xhevë Krasniqit Lladrovci. Po asnjë post nuk i dhamë. Nejse... Fitnete Ramosaj do mbetet tregimi më i mirë për katër vajzat e mia”. (Po aty, “Kosova Sot”, 5, prill 2019).

E pabesueshme dhe e dhimbshme kjo e vërtetë e margjinalizimit të Fitnete Ramosajt (luftëtare dhe veprimtare e dalluar e UÇK-së), sepse vendin e saj në qeverinë, në parlamentin , në institucionet dhe në organet e larta shtetërore të Kosovës e kanë rrëmbyer “maskarenjtë dhe horrat” e Fan S. Nolit dhe vrasësit çetniko-fashistë të UÇK-së, të lirisë dhe të pavarësisë së Kosovës (2000-2019), të cilët, edhe në kohë paqeje nuk e njohin Kosovën si shtet të tyre, por vetëm Serbinë gjenocidale, e cila dogji dhe shkrumboi Kosovën, duke vrarë dhe masakruar mbi 12 mijë shqiptarë dhe, duke dhunuar mbi 20 mijë femra shqiptare.

Ky është shkaku pse u margjinalizua heroina e UÇK-së , Fitnete Ramosaj; pse nuk pati asnjë post në pushtetin shtetëror të Kosovës për Fitnete Ramosaj. Pra, siç ka pohuar me të drejtë deputeti Milaim Zeka për Fitnete Ramosajn “nuk pati asnjë post për të”, edhe pse ajo luftën e bëri dhe kishte meritat, që të ishte në ballë të qeverisë dhe të Parlamentit të Kosovës, por ja që, siç thotë Rilindësi ynë eurudit dhe patriot Fan S. Noli : “Luftën e bëjnë heronjtë, qeverisin maskarenjtë dhe përfitojnë horrat”. Kjo ishte lufta gllabëruese bajraktariste, nepotiste dhe sektariste për pushtet dhe për para në kohë paqeje në Kosovë, e cila e margjinalizoi dhe e harroi heroinën e merituar të UÇK-së, Fitnete Ramosaj nga Deçani dhe, në vend të saj përqafuan si aleat në qeverinë dhe në kuvendin e Kosovës, “Srpska Listën”, pjesëtarët e së cilës në kohë lufte e vranë UÇK-në, kurse në kohë paqeje nga foltoret e parlamentit dhe të qeverisë së Kosovës, UÇK-në e quajnë hiq më ndryshe sesa “terroriste”.

Ky është turpi, tradhtia, pabesia, padrejtësia dhe mohimi i gjakut të heronjve dhe të dëshmorëve-vlerave të UÇK-së siç ishte edhe Fitnete Ramosaj me motrat dhe me vëllezërit e saj nën flamurin e UÇK-së, por në paqe plotësisht të harruar dhe të margjinalizuar nga “maskarenjtë dhe horrat” në pushtet të Fan S. Nolit.

Ngushëllime të sinqerta familjes Ramosaj dhe UÇK-së së ditëve të luftës

Me këtë rast, së bashku me ju ndaj pikëllimin dhe dhembjen e madhe për vdekjen e bijës së juaj të dashur faqebardhë, luftëtares së UÇK-së-HEROINËN e Kosovës , Fitnete Ramosaj.- I lehtë i qoftë dheu i Shqipërisë Etnike dhe, kujtimi i saj qoftë i përjetshëm në zemrat dhe në historinë e lavdishme të gjithë kombit shqiptar, sot, nesër dhe për jetë të jetëve. –Pushka dhe pena e saj gjithmonë do të jenë abetarja e pavdekshme e kombit dhe e atdheut shqiptar.

Që nga vitet e 90-ta të shekullit XX e derisa më 5 prill 2019, kur mbylli sytë përjetësisht, Fitnete Ramosaj ishte ndër zërat më të guximshëm të penës edhe të pushkës kundër hordhive pushtuese çetniko-fashiste serbe dhe kundër padrejtësive, vrasjes, torturave, burgosjes, arrestimeve, masakrave, plojës së popullit shqiptar në Kosovë.

Edhe pas mbarimit të luftës, në kohë paqeje, Fitnete Ramosaj nuk pushoi së vepruari në shërbim të lirisë dhe të pavarësisë së Kosovës, duke botuar shumë vepra për betejat e lavdishme të UÇK-së kundër okupatorit barbar serb.

Kush ishte “Amazona” e Deçanit, heroina e Kosovës?

Për portretin e luftëtares, intelektuales (Mr. e Shkencave të Sigurisë) dhe patriotes dhe atdhetares Fitnete Ramosaj flasin këto fakte dhe argumente të përmbledhura në https://sq.wikipedia.org/wiki/Fetnete_Ramosaj :

“Fitnete Ramosaj, u lind më 1972, në Deçan. Shkollën fillore dhe atë të mesme i kreu në Deçan. Shkollën e Lartë Pedagogjike në Gjakovë, Fakultetin dhe studimet pasuniversitare në Prishtinë. Ka magjistruar në shkencat e sigurisë.

Që nga viti 1989 ishte pjesëtare aktive e lëvizjes ilegale dhe asaj gjithëpopullore në Kosovë. Ka qenë pjesëmarrëse aktive në luftën çlirimtare, si pjesëtare e Ushtrisë Çlirimtare të Kosovës. Gjatë luftës në Kosovë (1998-1999), veç tjerash, ka kryer detyrën e Zëdhënëses së UÇK-së për Zonën Operative të Dukagjinit. Njëkohësisht ka raportuar edhe për Agjencinë Shtetërore të Lajmeve të Kosovës "KosovaPress", Radion "Kosova e Lirë", Radio Televizionin Shqiptar (RTSH), etj.

Ka bashkëpunuar me agjencitë ndërkombëtare të lajmeve "Zëri i Amerikës", "Deutsche Welle", "BBC" dhe me shtypin shqiptar të kohës në Kosovë, Shqipëri e diasporë. Ka qenë bashkëthemeluese dhe redaktore e revistës "Zgjimi", Deçan (1991-1997); bashkëpunëtore dhe anëtare e redaksisë së gazetës "Zëri i Kosovës", Zvicër/Prishtinë (1995-2001); bashkëthemeluese dhe redaktore e revistës së parë ushtarake në Kosovë "Ardhmëria" - Organ i Zonës së Tretë të Mbrojtjes (1999-2001); redaktore në gazetën javore "Fokus", Prishtinë (2003-2007), etj. Është autore e disa fejtoneve e dhjetëra shkrimeve publicistike, të botuar në shtypin legal e ilegal të kohës që nga viti 1991 e këndej; recensuese, lektore dhe redaktore e disa librave publicistikë, historikë e të çështjeve të sigurisë; pjesëmarrëse me kumtesa shkencore në disa simpoziume e konferenca shkencore ndërkombëtare, etj.

Është autore e librave:

· DEÇANI (Monografi), në bashkautorësi me Faton Mehmetaj, botoi "Zgjimi", Deçan, nëntor 1997, 528 f.

· "Krimet serbe në Kosovë – PA APOLOGJI - Me fakte kundër shpifjeve" / "Serbian crimes in Kosova - WITHOUT APOLOGY - Facts Against Defamations" (Vëllimi i Parë, shqip/anglisht), botoi "Fokusi", Prishtinë, 2005. Ribotuar në të njëjtin vit në 10 mijë kopje, 350 f.

· "Krimet serbe në Kosovë – PA APOLOGJI – Me fakte kundër shpifjeve", (Vëllimi i Dytë), botoi "Anatema", Prishtinë, 2008, 442 f.

· "Serbian crimes in Kosova – Without Apology – Facts Against Defamations", (The Second Volume), botoi "Anatema", Prishtinë, 2008, 446 f.

· "Organizatat ekstremiste serbe në Kosovë", botoi ISGJS, Prishtinë, 2013, 183 f.

· "Serbian extremist organizations in Kosova", botoi ISGJS, Prishtinë, 2015.” (Burimi: https://sq.wikipedia.org/wiki/Fetnete_Ramosaj).

Fitnete Ramosaj, heroinë në luftë, viktimë e NEPOTIZMIT në paqe !?

E gjithë kjo veprimtari e gjerë dhe e begatë në shërbim të diturisë, të lirisë, të kombit dhe të atdheut, “nuk kanë mjaftuar”, që Mr. Fetnete Ramosaj të gëzonte ndonjë POST zyrtar qoftë në qeverinë, qoftë në Presidencën, qoftë në Kuvendin e Kosovës etj. !? -Sigurisht se ka merituar të jetë në ballë të Kosovës së lirë dhe të pavarur, ashtu siç ishte në ballë të UÇK-së, gjatë Luftës kundër pushtuesit të huaj serb. Mirëpo, kjo nuk ndodhi në kohë paqeje, sepse të gjitha pozitat dhe postet udhëheqëse i uzurpuan liderët politikë NEPOTISTË dhe karrieristë me familjet e tyre, me miqtë, me bashkëpartiakët, me bashkëkorrupsionistët, me bashkëkolltukofagët dhe me bashkëfeudalët e tyre sipas mëhallëve, provincave dhe rajoneve të ndryshme të Kosovës.

Si rrjedhojë, Fitnete Ramosaj diskriminohet dhe margjinalizohet, duke mbetur pa asnjë POST në shtetin e saj thënçin demokratik dhe të lirë për të cilin tri dekada kishte flijuar çdo gjë si luftëtare e UÇK-së (1989-2019). Çfarë të thuhet për këtë nonsens, padrejtësi, margjinalizim, diskriminim dhe mohim të VLERËS-Fitnete Ramosaj, kush është fajtori dhe armiku në këtë rast, Serbia, Greqia dhe Rusia, JO asnjëra prej tyre, por jemi ne-antivlerat-armiqtë e brendshëm , siç thoshte dikur rilindësi i njohur Faik Konica se “ARMIKU I SHQIPTARIT ËSHTË VETË SHQIPTARI”.

Ky është problemi ynë numër 1, jo as Serbia, as Rusia, as Greqia e as Bullgaria etj. –Pa davaritjen e këtij problemi të vjetër shekullor, e vështirë është të mbrohen vlerat kombëtare shqiptare sikurse Fetnete Ramosaj, si dhe të bashkohen “copat e shqyera” të kombit dhe të Shqipërisë Etnike.

(Kosova Sot)