Receta e Cekës - Sheqerpare me arra

PËRBËRËSIT:

1 kg gjalpë të zbutur, 1 kg miell, 12 të verdha vezësh dhe 1 e tërë, 1 lugë çaji sodë buke, 300 gr arra të grimcuara, 2 kg sheqer.

Gjalpi i zbutur pritet në pjesë të vogla me thikë. Përzihet me dorë duke i shtuar vezët një nga një. Pasi të bëhet masë e njëllojtë, hidhet mielli i përzier me sodë dhe përzihet mirë. Brumi futet në frigorifer për 2-3 orë ose tërë natën. Nga brumi i përgatitur ndahen 45- 50 gogla, të cilat hollohen sa një pjatë e vogël. Brumi i holluar paloset në katërsh dhe prapë rritet në katrorë, në diametër 10 centimetra. Në mes të çdo katrori qiten arra të grimcuara, bashkohen skajet dhe sheqerparet radhiten në tepsi të lyer me gjalpë. Furra nxehet në 200 gradë C dhe, sa të futet në furrë, ulet temperatura në 170 gradë C për të pjekur gjersa të marrë ngjyrë ari. Me të njënjtin brumë mund të përgatiten edhe sheqerpare në formë trëndafili.

Brumi hollohet dhe me anë të gotës nxirren nga 4 rrumbullakë, të cilët e mbulojnë deri në gjysmë njëri -tjetrin, pastaj priten përgjysmë, hidhen arra në petën e parë dhe mbështillen trëndafilat. Edhe sheqerparet e rrumbullakëta klasike, përgaditen me të njejtin brum. Këtyre mund t’u vendoset\ mbi nga një thelp arre. Sherbeti: Sheqeri në tenxhere duhet të mbulohet me ujë për dy gishta. Hidhet një limon i prerë në flegra. Pasi të vlojë dhe të trashet sikurse sherbeti i bakllavasë, largohet nga zjarri, i shtohet 1 filxhan i kafes ujë i ftohtë dhe sheqerparja e ftohur përvëlohet me sherbet të nxehtë. Në mënyrë që ta thithë më mirë sherbetin, sherbeti i hidhet me lugë sipër çdo sheqerpareje nga disa herë. Mbulohet me tepsi ose letër plastmasi gjersa të ftohet.

(Kosova Sot Online)