Të gjitha dobitë e portokajve

Portokalli është i pasur me vitamina C, B, E, me provitaminën A, si dhe me minerale, si kalcium, magnez, kalium dhe fosfor. Ai ka edhe oligoelemente, por edhe sheqer. Lëngu i limonit përmban të gjithë përbërësit si edhe pema, por vetëm nëse pihet menjëherë pas shtrydhjes. Studimet e reja tregojnë se, një portokall në ditë, mund të jetë i dobishëm për mbrojtjen nga disa forma të kancerit.

Dobitë e tjera të portokallit

Portokajtë janë aleatë të fuqishëm në luftë kundër sëmundjeve kardiovaskulare, meqë përmbajnë sasitë më të mëdha të antioksiduesve nga të gjitha pemët. Ekspertët thonë se portokalli zvogëlon trashjen e enëve të gjakut për 30%. Antioksiduesit e portokallit zvogëlojnë ndikimin e toksineve, të cilat krijohen kur organizmi është nën stres. Konsumimi i rregullt i portokajve po ashtu ndikon që flokët të jenë më elastikë, e thonjtë më shkëlqyes.

Lëngu i portokallit

Edhe pse përbërësit i kanë të njëjtë, më i dobishëm është konsumimi i lëngut të portokallit, sesa ngrënia e një portokalli. Lëngu i freskët i portokallit, i përzier me ujë, gati tetë herë më shpejt arrin në qarkullim të gjakut dhe më lehtë metabolizohet në lukth. Në vend se t’i shtoni sheqer, shijen e fortë të lëngut të portokallit zbuteni duke shtuar ujë.

Kundër gripit dhe ftohjes 

Adhuruesit e mjekësisë popullore këshillojnë konsumimin e deri gjysmë gote të lëngut të portokallit, para buke, tri herë në ditë, në kohëzgjatje prej shtatë javësh, me qëllim të shërimit të infeksioneve të rrugëve të frymëmarrjes. Kundër ftohjes preferohen katër gota të lëngut të portokallit në ditë, derisa të përmirësohet gjendja.

Lëvorja e portokallit, e dobishme për lëkurë

Portokajtë ndihmojnë kundër djegieve të shkaktuara nga dielli. Lëvorja e portokallit përdoret edhe në kozmetikë, ku nga ajo përgatiten kremra dhe parfume. Lëvorja e portokallit përmban sasi të madhe të faktorit mbrojtës, të quajtur d-limonene. Lëvoren mund ta përdorni edhe në kuzhinë. Nëse çdo javë e hani nga një lëvore të portokallit, atëherë në një masë të madhe e zvogëloni rrezikun nga kanceri i lëkurës.

Çaji nga gjethet e portokallit

– Qitni një lugë gjethe në 2 dl ujë, lëreni që të qëndrojë dhjetë minuta dhe kullojeni. Çaji nga gjethet e portokallit është një ilaç i vjetër kundër nervozizmit, pagjumësisë, depresionit dhe epilepsisë.

Çaj i akullt nga portokalli

Përbërësit:

– dy portokaj
– katër lugë të ujit të valë
– pesë qese të çajit sipas dëshirës
– katrorë të akullit
– mjaltë, apo sheqer i vrugtë sipas shijes

Përgatitja:

– Qëroni portokajtë. Lëvoren dhe qeset e çajit i përvëloni me ujë, i leni që të qëndrojnë dhe, pas pesë minutash, i kulloni. Çajin e ftohtë e përzieni në mikser me portokall. Çajin e ëmbëlsoni sipas dëshirës dhe i shtoni katrorë të akullit.

(Kosova Sot Online)