Vazhdon beteja mes Cardiffit dhe Nantesit për Emiliano Salan

  • 03 April 2019 - 13:23
Vazhdon beteja mes Cardiffit dhe Nantesit për Emiliano Salan

Cardiff City dëshiron që të fillojë bisedime të drejtpërdrejta me Nantesin, në tentim për ta zgjidhur mosmarrëveshjen për shumën prej 17 milionë eurove për transferimin e Emiliano Salas, i cili vdiq në një aksident ajror në janar.

Organi qeverisës i futbollit botëror, FIFA, u ka dhënë klubeve afat kohor deri më 15 prill për ta zgjidhur këtë problem, pasi Cardiffi nuk e kishte bërë pagesën e parë për transferimin e argjentinasit.

FIFA fillimisht kishte kërkuar për më shumë prova, para se ta marrë vendimin përfundimtar për këtë çështje. Megjithatë, Cardiffi pretendon se Nantesi nuk i është përgjigjur thirrjes së tyre për ta aranzhuar një takim.

“Cardiff City ka kërkuar dhe e ka fituar zgjatjen e afatit kohor për t’i dhënë përgjigje FIFA për këtë çështje. Së fundi, Cardiff City i ka shkruar Nantesit, duke ia propozuar një takim për t’i diskutuar problemet lidhur me tragjedinë e Emiliano Salas e transferimit të planifikuar”, thuhet në deklaratën e lëshuar nga klubi anglez.

“Ky propozim është në të njëjtën vijë me kërkesën e FIFA-s që të dy klubet ta gjejnë një zgjidhje sa më shpejt. Deri më tani, Cardiff City nuk ka marrë përgjigje nga Nantesi”.

Cardiffi pretendon se marrëveshja e arritur me Nantesin për transferimin e Salas nuk ishte ligjërisht obliguese. Ata thonë se kushtet e kontratës, të cilat ishin caktuar nga klubi francez, nuk ishin kompletuar plotësisht.

Në anën tjetër, Nantes pretendon se i ka kompletuar të gjitha dokumentet e nevojshme dhe se gjithçka ka qenë në pajtueshmëri me rregullat e FIFA-s.

Presidenti i FIFA-s, Gianni Infantino, ka bërë të ditur se ai po shpreson se dy klubet në fjale do ta arrijnë ndonjë marrëveshje mes vete, pa pasur nevojë të ndërhyjë një palë e tretë.

Sala, 28-vjeçar, u zyrtarizua si lojtar i ri i Cardiff Cityt më 19 janar. Vetëm dy ditë më vonë, ai vdiq në një aksident ajror, pasi aeroplani me të cilin po udhëtonte nga Nantesi në Cardiff u rrëzua mbi Kanalin Anglez.

Aeroplani ishte drejtuar nga piloti David Ibbotson, i cili është ende i zhdukur. BBC-ja ka raportuar se Ibboston nuk kishte qenë i licencuar për ta drejtuar atë aeroplan. Ai besohet se kishte daltonist dhe licenca e tij ishte e kufizuar vetëm gjatë ditës, e jo edhe gjatë natës, kur ishte bërë udhëtimi në fjalë. 

(Kosova Sot)