'T’q***** robt', Sadiku kthehet nga stoli dhe shan shqip pas golit të bukur në Zvicër
Armando Sadiku u kthye protagonist këtë fundjavë duke shënuar një gol të mrekullueshëm nga një distancë e konsiderueshme në barazimin 1-1 të Luganos në udhëtim te Baseli.
Sulmuesi i Kombëtares shqiptare e nisi ndeshjen nga stoli, pasi nuk preferohet si titullar nga trajneri, Fabio Celestini.
Ai u fut në lojë menjëherë në pjesën e dytë dhe e gjeti golin pas më shumë se 20 minutave lojë.
Në minutën e 67’, sulmuesi 27-vjeçar shënoi golin e avantazhit për skuadrën e tij.
Por, Sadiku nuk e festoi golin, dhe ka reaguar ashpër edhe ndaj përqafimit të shokut të skuadrës, duke e shtyrë fortë.
Menjëherë pas golit shumë të bukur që shënoi, ndoshta më të bukurin në karrierë – bomberi shqiptar u kthye nga stoli i skuadrës së tij duke sharë fort në shqip.
Nuk dihet se ndaj kujt e ka pasur, por mund të jetë edhe një inat ndaj trajnerit zviceran që nuk e ka hedhur në fushë.
Në këtë ndeshje, Sadiku kishte përballë tre shqiptarë; Taulant Xhakën, Albian Ajetin dhe Edon Zhegrovën – që të tre përfaqësojnë shtete të ndryshme, Shqipërinë, Zvicrën dhe Kosovën.
Xhaka dhe Ajeti ishin titullar, kurse Zhegrova u inkuadrua në minutën e 89’.
(Kosova Sot)