Ka përfunduar gjysmëmaratona ‘Prishtina 2019’
Ka përfunduar edicioni i 19-të i gjysmë maratonës “Prishtina 2019” i organizuar nga Federata e Atlektikës së Kosovës në bashkëpunim me Komunën e Prishtinës. Si edicionin e kaluar edhe këtë vit shumicën e çmimeve të vendeve të para i fituan garuesit e huaj nga Kenia.
Edhe në këtë maratonë mori pjesë kryeministri Ramush Haradinaj, i cili garoi në shtegun e 21 km, por që ishte ndër garuesit e fundit që e përfunduan garën.
Ai pas garës tha se duhet të bëhen disa ndryshime në shtegun e garës pasi sipas tij sportistët nuk duhet të dërgohen afër Obiliqit për shkak të tymit.
I përgëzoj të gjithë garuesit, prej më të rinjve e deri të më të vjetrit, pjesëtarët e policisë, ekipet mjekësore, ushtarët e FSK-së, të cilët u kujdesen për mbarëvajtjen e kësaj ngjarjeje, që ka qenë e mrekullueshme. Është e mundur të bëhen edhe disa përmirësime në organizim, që të jemi edhe ne në hap me trendët globale, duke bërë ndryshime në rrugë janë sportistë dhe sportistët nuk duhet ti dërgojmë nga Obiliqi për shkak të tymit. Nuk po më vjen mirë për besë por çka me bë, sporti është sport, sportistët e mirë fitojnë”, u shpreh Haradinaj.
Në kategorinë e seniorëve te meshkujt i pari doli Hosea Kiplagat Tue, ndërsa i dyti përfundoi Abel Kibet Rop, dhe podiumin e përmbylli garuesi nga Maroco Youssef Sbaai. Fituesi i vendit të parë në kategorinë e meshkujve ishte shumë i lumtur me triumfin dhe pas garë tha se ai vazhdimisht merret me atletikë.
“Gara ishte shumë e mirë, ishte shumë e fortë, unë me të vërtete e shijova. Unë vazhdimisht stërvitem dhe gjithmonë jam i pranishëm në atletikë”, pohoi ai.
Në kategorinë e femrave gjithashtu fituese doli garuesja, Ruth Chemisto Matebo nga Kenia, vendi i dytë Euliter Jepchipchir nga Kenia, vendi i tretë Ruth Nundu Mbatha gjithashtu nga Kenia.
Ajo pas fitores u shpreh tejet e lumtur, duke theksuar se kjo është hera e dytë që merr pjesë në këtë kompeticion, ndërkohë që vitin e kaluar ajo ka përfunduar në vendin e dytë.
“Ky është viti i dytë, vitin e kaluar isha këtu dhe fitova vendin e dytë, këtë vit janë këtu dhe mora vendin e parë, e pëlqej organizimin vendi është i mirë, falënderoj organizuesit për ftesën. Gara ishte shumë e mirë gjithashtu më pëlqen vendi dhe njerëzit këtu”, u shpreh garuesja nga Kenia.
Në këtë marton pjesëmarrës ishte edhe presidenti i Komitetit Olimpik të Kosovës, Besim Hasani, i cili mori pjesë në garën e 5 km, dhe të cilën e përfundoi me sukses.
Ai pas pjesëmarrjes u shpreh se vazhdimisht merr pjesë në këtë gjysmë maratonë dhe synim kësaj radhe ishte ta mposhtë vetveten
“Unë që nga nisja e gjysmëmaratonës unë vrapoj, ndoshta tri, katërraste për shkak të udhëtimeve të mija jashtë vendit, nuk ka mundur me marrë pjesë. Herën e parë kam vrapuar në gjysmëmaratonën 21 km dhe çdo herë tjetër vetëm pesë kilometra e kam vrapuar. Por caki këtë vit ishte ta kalojë vetveten sepse në vitin 2018 sipas statistikave që i mban Federata e Atletikes kisha vrapuar për 39 minuta e 5 sekonda dhe sot doja të vrapoja për 39 minuta por meqenëse nuk e matje kohën por doja ta thoja këtë rekord e kalova për një minutë ma herët”, u shpreh Hasani.
Kujtojmë që vitin e ardhshëm Federata e Atletikës së Kosovës do të organizojë këtë gjysmëmaratonën për të 20-tën herë me radhe dhe sipas tyre pritet të ketë ndryshime të madhe e sidomos te shtegu ku do të mundohen ta zgjasin në 41 kilometra.
(Kosova Sot)
