Lopetegui zbulon arsyen pse e shkarkoi Real Madridi

  • 17 maj 2019 - 08:35
Lopetegui zbulon arsyen pse e shkarkoi Real Madridi

Ish-trajneri i Real Madridit, Julen Lopetegui, e ka pranuar se ai mbeti i zhgënjyer ka periudha e shkurtër në Santiago Bernabeu. Ai beson se do të kishte bërë punë të mirë nëse do t’i ishte dhënë më shumë kohë.

Julen Lopetegui shkaktoi një trazirë të madhe verën e kaluar, kur e mori pozitën e trajnerit të Real Madridit përderisa ishte ende trajner i ekipit kombëtar të Spanjës, që po përgatitej për Kupën e Botës në Rusi

Vendimi i tij për ta pranuar pozitën në Real Madrid bëri që ta humbë pozitën në Kombëtaren e Spanjës vetëm disa ditë para se të fillonte turneu i Kupës së Botës. Mirëpo, as koha e tij në Santiago Bernabeu nuk zgjati shumë.

Një ecuri e rezultateve të dobëta e arriti kulmin te disfata 5:1 kundër Barcelonës. Lopetegui u shkarkua menjëherë, pas vetëm dhjetë ndeshjeve të zhvilluara në La liga. Santiago Solari e zëvendësoi atë, mirëpo edhe ai u shkarkua dhe në fund në këtë pozitë u riemërua Zinedine Zidane.

Lopetegui tani e ka fajësuar fatin e keq para portës për shkarkimin e tij.

“Ne e kishim një fillim të mrekullueshëm dhe luajtëm ndeshje të mrekullueshme. Por, pastaj i patëm tri javë me fat të qelbur para portës, në ndeshje ku ne ishim skuadra më e mirë. Këto gjëra mund t’i ndodhin secilës skuadër”, ka thënë Lopetegui.

“Ne menduam se kishte ende kohë dhe ne patëm diçka që ishte vendimtare: përkushtim absolut nga lojtarët dhe nga një skuadër që kishte shumë gjëra të mrekullueshme për të dhënë”.

(Kosova Sot Online)