Mbyllen pesë ndeshjet e IPKO Superligës, këto dy skuadra përfundojnë në barazh

 

Janë mbyllur pesë ndeshjet e xhiros së fundit të kampionatit në IPKO Superligën e Kosovës në futboll, ku janë arritur rezultate kryesisht të pritshme. Gjilani dhe Trepça ’89 kanë përfunduar në barazh

Janë mbyllur tashmë pesë ndeshjet e xhiros së 32-të dhe të fundit të këtij sezoni në IPKO Superligën e Kosovës në futboll.

Në bazë të rezultateve të arritura sot, Gjilani dhe Trepça ’89 përfundojnë në barazh.

Mitrovicasve nuk iu mjaftoi fitorja ndaj KEK-ut me rezultat bindës me golat e Hasan Hysenit, Lassine Traore e Franck Herman, kurse gjilanasit u dorëzuan përballë Ferizajt, nga i cili humbën 2:1.

Golat për ferizajasit i shënuan Qëndrim Dautaj e Dardan Çerkini në pjesën e dytë, kurse Wilber Perez i kishte kaluar në epërsi gjilanasit në atë të parë.

E skuadrat që iu shmangën barazhit janë Flamurtari, Ballkani dhe Drenica.

Kuqezinjtë prishtinas e mposhtën Llapin me rezultat 3:2.

Për flamurtarët dy gola i shënoi Mërgim Boshnjaku e një tjetër Alban Shillova.

Kurse, për llapjanët shënuan Behar Maliqi e Ahmed Januzi.

E therandasit ishin më të mirë se Drita, 2:0. Golat për ekipin Portokalli i shënoi Blend Baftiu.

Kurse, Kuqezinjtë drenicas fituan në Prizren ndaj Lirisë me rezultat 3:1.

Golat për Drenicën i shënuan Osman Mëziu dhe Armend Abazi dy herë.

Ndërkaq, golin e vetëm dhe të pamjaftueshëm për prizrenasit e shënoi Diellor Beseni.

(Kosova Sot Online)